Bayraqdar.info – Xəbər verdiyimiz kimi təhsil naziri Emin Əmrullayev avqustun 20-də “Ümumi təhsil müəssisələrinin 2021-2022-ci dərs ili üçün tədris planlarının təsdiqi haqqında” Əmr imzalayıb.
Maraqlıdır ki, Əmrdə mövcud ictimai-siyasi durumun tələblərinə uyğun bəzi məqamlar da diqqət çəkir. Məsələn, nazirin Əmrinə görə, bu ildən başlayaraq Azərbaycan məktəblərində “Ortaq türk tarixi” də tədris ediləcək. Düzdür, bu dərs mütəmadi və bütün məktəblər üçün məcburi deyil. Lakin istənilən halda ilk addım kimi təqdir etmək olar.
Öz növbəsində tarix elmləri doktoru, Türk İslam Araşdırmaları Mərkəzinin başqanı Telman Nüsrətoğlu bayraqdar.info-ya özəl açıqlamasında bu sənədin əhəmiyyəti barədə danışıb. Bu Əmrin imzalanmasını vacib və türk dünyasının inteqrasiyasının daha da dərinləşməsinə xidmət edən bir addım kimi dəyərləndirən tarixçi alim deyib: “Biz bilirik ki, Sovet dövründə aparılan antitürk siyasəti çərçivəsində türk xalqlarını, türk dünyasını bir-birindən ayırmağa çalışıblar. Tarixin yazılması, milli kimliyin formalaşdırılması məsələsində də eyni siyasət həyata keçirilib. Xüsusilə Azərbaycanın və digər türk dövlətlərinin ümumtürk tarixi kontekstindən qoparılaraq bu respublikalarda sifarişli tarixin tədris edilməsi bir məqsədə xidmət edib – SSRİ imperiyasının tərkibində olan türk respublikaları üçün türk dünyası tarixindən kənar saxta tarix yazmaq, türk milli kimliyini unutdurmaq, “vahid sovet xalqı” ideologiyasını təlqin etmək”.
T.Nüsrətoğlu bildirib ki, artıq zaman və şərtlər dəyişib: “Biz türk xalqları olaraq böyük və nəhəng bir tarixi təmsil edirik. Fransız tarixçisi Jan-Pol Ru türklərin tarixiylə bağlı yazmış olduğu əsərində deyir ki, tarixin içərisindən türklərin tarixini çıxarsaq dünya tarixi boşalar. Türklərin tarixi bu mənada dünya tarixinin də doğru anlaşılması üçün olduqca mühümdür. Təbii ki, bu şanlı tariximizin təhsil müəssisələrində öyrədilməsi lazımdır. Məhz bu baxımdan Təhsil Nazirliyinin son dövrlər istər ümumtürk tarixi, yəni ortaq türk tarixinin dərslik olaraq orta məktəblərdə tədris edilməsi, istərsə də ali məktəblərdə Osmanlı tarixi, Türkiyə Cümhuriyyəti tarixi dərslərinin açılması ilə bağlı qəbul etdiyi qərarları ancaq alqışlamaq olar. Hesab edirəm ki, bunlar, olduqca vacib və türk dünyasının inteqrasiyasının daha da dərinləşməsinə xidmət edən qərarlardır”.
