Son yeniləmə: 19 Mart 2022 14:33
“Novruz ənənələri ABADda” adlı festivalda ASAN xidmətin rəhbəri Ülvü Mehdiyev də iştirak edib
Bayraqdar.info – Yarandığı vaxtdan çoxsaylı tədbirlər və aksiyalarla diqqət mərkəzində olan “ABAD”ın (Ailə Biznesinə Asan Dəstək publik hüquqi şəxs) Novruz bayramına da özünəməxsus şəkildə hazırlaşdığı barədə xəbər vermişdik.
Həmin xəbərdə qeyd edilirdi ki, bayram münasibətilə “Novruz ənənələri ABADda” adlı festival keçiriləcək.
“ABAD” etno-butikində Novruz festivalı
Beləliklə, həmin bayram tədbiri baş tutub. Belə ki, martın 18-də “İçərişəhər” Dövlət Tarix-Memarlıq Qoruğunda yerləşən “ABAD” etno-butikində “Novruz ənənələri ABADda” adlı festivalı keçirilib.
Bu barədə ABAD-dan bayraqdar.info-ya martın 19-da məlumat veirlib. Bildirilib ki, festival özündə xalqımızın ən qiymətli milli-mənəvi dəyərlərindən biri olan Novruz bayramını, onun mənşəyi, tarixi və adətlərini özündə təcəssüm etdirib.
Festivalda yumurta döyüşü
Bu əlamətdar bayram tədbirində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev də iştirak edib. Agentliyin rəhbəri festivala gələnlərin bayramını təbrik edib, Novruz ənənəsinə uyğun olaraq yumurta döyüşüb.
Novruz mövzusunda məhsulları qonaqlara təqdim olunub
Bundan başqa vurğulanıb ki, “ABAD” publik hüquqi şəxs mikro, kiçik və orta sahibkarlığa dəstəyə köklənməkdən əlavə mədəniyyətə də öz töhfəsini verməkdə davam edir.
Belə ki, festivalda Novruz bayramının ənənələri təbliğ edilib, eləcə də “ABAD”çıların Novruz mövzusunda məhsulları qonaqlara təqdim olunub.
18 mart tarixi təsadüfi seçilməyib
Qurumun Marketinq, beynəlxalq və ictimaiyyətlə əlaqələr departamentinin müdir müavini Qəmər Bağırovanın bayraqdar.info-ya verdiyi məlumata görə, 18 mart tarixi də təsadüfi seçilməyib: “Məhz bu tarixdə 5 il öncə “ABAD”ın İçərişəhərdə yerləşən ilk etno-butiki fəaliyyətə başlayıb”.
Onun sözlərinə görə, bundan başqa festivalın qonaqları ənənəvi Novruz süfrəsinin yığılmağını seyr edərək, süfrəyə düzülən nemətlərin rəmzi mənası haqqında məlumatlar əldə ediblər: “Xüsusi hazırlanmış zonalarda Novruz adətlərinə uyğun əyləncələr təqdim edilib ki, bu sıraya Novruz falları, hədiyyəli yumurta döyüşü, yumurta bəzədilməsi master klassı, xınayaxdı, xonça bəzəməsi master klassı, milli fotosessiya, milli musiqi və s. daxil idi”.
