BAYRAQDAR MEDİA – Azərbaycanın milli aviadaşıyıcısı AZAL 2025-ci ilin birinci rübü üzrə fəaliyyətinin yekunlarını elan edib. Aviaşirkət sərnişin axınının yüksək olduğu ilk üç ay ərzində fasiləsiz və rahat sərnişin daşınması fəaliyyətini yüksək səviyyədə təmin edib.
Bu haqda xəbər BAYRAQDAR MEDİA-ya “Azərbaycan Hava Yolları” QSC-nin mətbuat xidmətindən daxil olub.
Xəbərdə bildirilir ki, “bu ilin ilk üç ayında 89 faiz uçuşların vaxtında yerinə yetirilməsi göstəricisi ilə 48 istiqamət üzrə 3 min 718 reys yerinə yetirilib. 2024-cü ilin birinci rübü ilə müqayisədə punktuallıq göstəricisi üzrə 1 faiz, reyslərin sayı üzrə isə 4 faiz artım müşahidə olunub. Qeyd edək ki, 2025-ci ilin mart ayında punktuallıq göstəricisi 93 faizə çatıb. Sözügedən dövr ərzində 865 min sərnişin daşınıb. Ötən ilin birinci rübündə bu göstərici 811 min nəfər olub. Bu da sərnişin sayında 7 faiz artım deməkdir.”
Ardınca xəbərdə, “sərnişin axınında ən pik göstərici 12 min 350 nəfər olmaqla 2025-ci il 12 yanvar tarixində qeydə alınıb. Ötən ilin yanvarın 7-də qeydə alınan ən yüksək sərnişin axını isə 11 min 200 nəfər olub” deyə qeyd edilir.
Bildirək ki, AZAL marşrut şəbəkəsini genişləndirmək, xidmət səviyyəsini təkmilləşdirmək, ən yüksək təhlükəsizlik və rahatlıq standartlarını təmin etmək istiqamətində fəaliyyətini davam etdirir.
İlk şərhi yaza bilərsiniz