BAYRAQDAR MEDİA – Azərbaycan Milli Elmlər Akademiyası (AMEA) Mərkəzi Elmi Kitabxanasının (MEK) Elektron resurslar şöbəsinin baş mütəxəssisi Xəyalə Məmmədli Vikipediyada “Azərbaycan kamança ifaçılıq sənəti” adlı məqalə yaradıb.
Məqalədə kamançanın quruluşu, hazırlanması, eləcə də onun materialları, texnologiyası, inkişaf tarixi və s. haqqında ətraflı məlumat yer alır.
X.Məmmədli BAYRAQDAR MEDİA-ya sözügedən məqaləni bu il Vikimedia fondu tərəfindən təşkil edilmiş “Feminizm və Foklor” məqalə müsabiqəsi nəticəsində ərsəyə gətirdiyini deyib: “Əslində bu məqalə rus Vikipediyasında azərbaycanlı şəxs tərəfindən yaradılıb. Məqalə təsadüfən qarşıma çıxdı və gördüm ki, bu mövzuda məqalə Azərbaycan dilində, ümumiyyətlə, rus dilindən başqa heç bir dildə yoxdur. Düşündüm ki, bu məqalənin üzərində işləyim, tərcümə edim, oradakı məlumatları dəqiqləşdirim, artırım və belə də etdim. Məqalədə Azərbaycanın musiqi sənətində önəmli yer tutan kamança alətinin keçdiyi tarixi yolu işıqlandırmışam”.
Qeyd edək ki, 2017-ci ilin dekabr ayının 7-də Koreyanın Jeju adasında keçirilən UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin 12-ci sessiyasında Azərbaycan və İranın birgə təqdim etdiyi “Kamança simli musiqi alətinin hazırlanması və ifaçılıq sənəti” UNESCO-nun Qeyri-Maddi Mədəni İrs üzrə Reprezentativ Siyahısına daxil edilib”.
İlk şərhi yaza bilərsiniz