Universitetin professoru beynəlxalq akademiyanın həqiqi üzvü seçilib
BAYRAQDAR MEDİA – Azərbaycan Tibb Universitetinin (ATU) professoru, tanınmış plastik-rekonstruktiv cərrah, tibb elmləri doktoru Vaqif Qələndər dünya tibb elmi və təhsili sahəsində göstərdiyi xidmətlərinə görə Türk Dünyası Araşdırmaları Beynəlxalq Elmlər Akademiyasının (TDABEA) həqiqi üzvü seçilib.
Bu barədə BAYRAQDAR MEDİA-ya Azərbaycan Tibb Universitetindın məlumat verilib.
Bildirilib ki, “Akademiyanın 3 mart 2025-ci il tarixli qərarına əsasən, V.Qələndər Qızıl Ulduz medalı ilə də təltif edilib. Bundan əlavə, TDABEA-nın rəsmi tövsiyəsi ilə İsveçrənin Cenevrə şəhərində yerləşən Beynəlxalq Mükafat Komitəsi tərəfindən professor V.Qələndərə birinci dərəcəli Hipokrat Ordeni təqdim olunub”.
Məlumatda o da qeyd edilib ki, ABŞ-ın Florida universitetində RuiFernandesin müəllifi olduğu “Local and Regional FlapsinHeadNeckReconstruction” dərsliyində professor Vaqif Qələndərin “Daxili döş arteriyası cərrahiyyəsi: yeni flebin təsviri” adlı bərpa üsulu “Vaqif Qələndər metodikası” kimi yer alıb və tədris olunur: “Bu istiqamətdə bir çox dərslik və dərs vəsaitlərinin müəllifi olan V.Qələndərin 6 yeni cərrahiyyə metodu, həmçinin 78 elmi əsəri xarici ölkə jurnallarında və beynəlxalq konfrans materiallarında nəşr edilib. Professor xaricdə bir çox elmi konfranslarda məruzəçi kimi iştirak edib, ölkəmizdə isə 3 dəfə Beynəlxalq Plastik və Rekonstruktiv Cərrahiyyə konfranslarının təşkilatçısı olub. O, Azərbaycan Plastik Cərrahiyyə İctimai Birliyinin qurucusu və sədri olmaqla, həm də Beynəlxalq Plastik və Rekonstruktiv Cərrahiyyə Konfederasiyasının idarə heyətinin üzvü, Beynəlxalq Plastik və Estetik Cərrahiyyə Assosiasiyasının milli katibidir”.
İlk şərhi yaza bilərsiniz