BAYRAQDAR MEDİA – 2016-cı ilin şanlı Aprel döyüşlərinin 9-cu ildönümü tamam oldu. Bu savaş Azərbaycan Ordusunun tarixi qələbələrindən biri olaraq xatırlanır. Hərbi zəfərlə yanaşı bu döyüşlər zamanı milli mübarizənin informasiya cəbhəsində fədakarlıq göstərmiş qəhrəmanlar da var. Onlardan biri də Güney Azərbaycanlı jurnalist və milli hərəkatın fədakar fəalı Səyyad Nejadəli olub.
Xəbəri “ArazNews” Telegram kanalı yayıb.
Bildirilib ki, “Səyad Nejadəli Qaradağın Həsrətan kəndindən idi. O, bölgədə tanınmış mədəni və ictimai fəal olaraq 2016-cı ilin Aprel savaşları zamanı Araz çayının Güney hissəsindən Ermənistan qüvvələrinin hərəkətləri və Azərbaycan Ordusunun irəliləyişləri barədə Güney Azərbaycan milli media platformalarına ardıcıl xəbərlər göndərirdi. Onun çəkdiyi görüntülər və yaydığı məlumatlar döyüşlərin beynəlxalq aləmdə işıqlandırılmasında mühüm rol oynadı”.
Xəbərə görə, “bu fəaliyyətlər İran hakimiyyətinin narahatlığına səbəb oldu. 2016-cı il avqust ayının 20-də İranın təhlükəsizlik qüvvələri Həsrətan kəndinə basqın edərək Səyyad Nejadəlini şəxsi avtomobilində güllə atəşinə tutub şəhid etdilər. Onun şəhid edilməsi 21 avqust 2016-cı ildə Xudafərin rayon məhkəməsinin rəsmi Telegram kanalında yer alan məlumatda da təsdiqlənmişdi. Həmin məlumatda rayon məhkəməsinin sədri jurnalistin təhlükəsizlik qüvvələri tərəfindən öldürüldüyünü bildirib”.
“Səyyad Nejadəlinin xatirəsi Aprel döyüşlərinin rəmzlərindən biri kimi daim yaşadılacaq. O, informasiya savaşında şəhid düşən milli qəhrəmanlarımızdan biridir”, – deyə bildirilir.
İlk şərhi yaza bilərsiniz