Azərbaycana qarşı qərəzli mövqedə olanlar

Fazil Mustafa: Bu, onların heç də demokratiyaya və insan haqlarına sadiqliklərindən deyil, erməni mənbələrindən aldıqları rüşvətdən, muzdlu xidmətlərindən qaynaqlanır

BAYRAQDAR MEDİA – “Prezident İlham Əliyevin XII Qlobal Bakı Forumunda çıxışı beynəlxalq aləmin diqqət mərkəzində oldu. Bu çıxış Azərbaycan dövlətinin regionda və beynəlxalq arenada tutduğu qətiyyətli mövqeyinin növbəti dəfə ifadəsi olmaqla yanaşı, həm də beynəlxalq münasibətlərin reallıqlarının və müasir geosiyasi dinamikaların konkret təsviri idi”.

Bunu BAYRAQDAR MEDİA-ya açıqlamasında BQP başqanı, Milli Məclisin Komitə sədri Fazil Mustafa deyib.

O qeyd edib ki, Prezident İlham Əliyev həmin çıxışında, həmçinin Azərbaycana qarşı qərəzli mövqedə olanlarla bağlı konkret adlar çəkdi: “Diqqəti çəkən mühüm məqamlardan biri ölkəmizə qarşı qarayaxma kampaniyasının aparılmasında və saxta, təxribatçı, yalan məlumatların yayılmasında mühüm rol oynayan mərkəzlərin və böyük media quruluşlarının, ABŞ-ın, Avropanın rüşvətxor siyasətçilərinin konkret adlarının dövlət başçısının çıxışında çəkilməsi oldu. Bu mənada ABŞ-ın Dövlət Departamentinin, Fransa prezidentinin ofisinin, Menendes, Adam Şif, Frenk Pallone, Nensi Pelosi kimi erməni pullarını ciblərinə qoyan ayrı-ayrı siyasətçilərin də adlarının çəkilməsini qeyd edə bilərik. Hesab edirəm ki, bu adların çəkilməsi ilə dövlət başçısı onu nəzərə çatdırdı ki, Azərbaycanı yerli-yersiz tənqid edən, ona qarşı qarayaxma kampaniyası aparan siyasətçilərin mövqeləri onların heç də demokratiyaya və insan haqlarına sadiqliklərindən deyil, erməni mənbələrindən aldıqları rüşvətdən, muzdlu xidmətlərindən qaynaqlanır”.