Türk Dövlətləri Təşkilatına üzv ölkələrin əməkdaşlıq baxımından önəm verdikləri ən mühüm sahələrdən biri də təhsildir
Mehmet Gökhan ÖZÇUBUKÇU – Türkiyənin Uluslararası Diplomatik İlişkiler, Akademik Araştırmalar ve Eğitim Derneği-UDİAD-ın sədr müavini. Özəl olaraq BAYRAQDAR MEDİA üçün.
BAYRAQDAR MEDİA – Bu danılmaz bir həqiqətdir ki, türk dövlətləri son illər həm ayrı-ayrılıqda, həm də kollektiv şəkildə beynəlxalq siyasətdə ciddi irəliləyişlər əldə ediblər. Bu da səbəbsiz deyil. Bu irəliləyişlərin təməlində türk dünyasının liderlərinin qətiyyəti, həmçinin türk birliyinin inkişafı üçün həyata keçirdikləri siyasət dayanır. Məhz bu qətiyyətdən irəli gələrək türk dünyasının daha da dərindən inteqrasiyası istiqamətində intensiv işlər aparılır. İnteqrasiyanın yolu və istiqamətləri də artıq bəllidir. Səmərqənd sammitində və ondan əvvəl müzakirə olunan məsələlər sırasında inteqrasiyanın dərinləşməsi üçün proseslərin əlifbadan energetikaya, logistikadan mədəniyyətə, mediadan təhsilə qədər mərhələli şəkildə həyata keçirilməsi nəzərdə tutulurdu.
Son zamanlar qlobal arenada parlayan ulduza çevrilən Türk Dövlətləri Təşkilatı xüsusilə Türkiyə və Azərbaycanın gərgin səyləri nəticəsində üzv ölkələr arasında əməkdaşlığı artırmaq üçün qanunvericilik, texniki infrastruktur və standartlaşdırma istiqamətində yeni addımlar atır. Ortaq mədəni keçmişi paylaşan və Avropadan Çinə gedən Orta Dəhliz marşrutu boyunca bir qurşaqda yerləşən türk dövlətləri Qarabağ Bəyannaməsi ilə öz aralarında həmrəylik inkişaf etdirəcəklərinə bütün dünyaya bəyan etdilər.
Bu gün biz inteqrasuyanın dərinləşməsi üçün atılan addımlardan bəhs ediriksə təhsil məsələsini ön sıralarda tutmalıyıq. Elə buna görə də Türk Dövlətləri Təşkilatına üzv ölkələrin əməkdaşlıq baxımından önəm verdikləri ən mühüm sahələrdən biri də təhsildir. Üzv ölkələrin təhsil nazirləri hər il bir araya gəlir. Türk Universitetlər Birliyi Orhun Mübadilə Proqramı ilə yanaşı, orta təhsil müəssisələrində qardaş məktəb və mübadilə proqramları da həyata keçirir.
Təhsildən bəhs edərkən, bildirək ki, türk dünyasının təhsil sahəsində atdığı ən mühüm addım Özbəkistanda Beynəlxalq Türk Dövlətləri Universitetinin yaradılması oldu. Birgə universitet təşəbbüsü Türk Dövlətləri Təşkilatının damı altında türk dövlətləri və xalqları arasında siyasi, iqtisadi, sosial, mədəni və hərbi əməkdaşlığa öz məqsədlərinə nail olmaq və daha akademik əsasda davam etmək üçün töhfə verəcək.Türk dünyasının uzunmüddətli strateji hədəflərinə uyğun olaraq türk coğrafiyalarından və ölkələrindən olan elm adamları və tələbələrlə ortaq bağın qurulmasını təmin edəcək.
Təbii ki, təhsil sahəsindəki uğurlar türk dünyasının inteqrasiyasının daha da dərinləşməsinə öz töhfəsini verir. Yəni, bu bir həqiqətdir ki, hazırda dünya nizamı öz tarazlığını itirib. Yeni dünya nizamının formalaşdırlması qaçılmazdır. Bu məqamda isə Türk Dövlətləri Təşkilatının qlobal aktor kimi önə çıxması, yeni dünya nizamının formalaşmasında öz sözünü deməsi vacibdir. Bunun üçün isə türk dünyası daxilində maarifləndirici fəaliyyətlər, gəncliklə bağlı layihələr inkişaf etdirilməli, dil, fikir və iş birliyimizi, xüsusilə gənclər arasında əməkdaşlıq və inteqrasiyanın ən mühüm elementi olan əlifba birliyimizi ən qısa zamanda qurmalıyıq.
Türk dünyası gənclərinin türk dövlətlərindəki universitetlərlə tələbə mübadiləsi proqramlarında iştirak etmələri, ortaq akademik layihələr və tədqiqatlar inkişaf etdirmələri, türk dünyasının alim və mütəfəkkirləri ilə öz inkişafları baxımından qarşılıqlı əlaqədə olmaları da vacibdir.
İlk şərhi yaza bilərsiniz