BAYRAQDAR MEDİA – martın 17-də sosial şəbəkələrdə Azərbaycanın sərhədində guya hərbi əməliyyatlar keçirilməsi ilə bağlı tədbirlərin görüldüyünü iddia edən, Azərbaycan Ordusuna məxsus hərbi texnikanın hərəkəti barədə videogörüntülər yayılıb. Faktla əlaqədar, Azərbaycan Respublikası Dövlət Təhlükəsizliyi Xidmətində cinayət işi başlanıldı, aparılmış ilkin araşdırmalar nəticəsində yayımlanmış videokadrların 27 fevral 2025-ci il tarixinə aid olduğu təsbit edilib.
Xəbəri Dövlət Təhlükəsizlik Xidməti yayımlayıb.
Xəbərə əsasən, “2007-ci il təvəllüdlü Rüstəmov Səməd Bəhman oğlu 2025-ci il fevralın 27-də Gədəbəy rayonu ərazisində Azərbaycan Respublikasının Silahlı Qüvvələrinə məxsus hərbi texnikanın hərəkətinin videoçəkilişini aparıb və qanunla yayılması qadağan olunan bu videomaterialı 2025-ci il martın 15-də özünün TikTok sosial şəbəkəsindəki səhifəsində paylaşıb. Bundan sonra, həmin videogörüntülərə sosial şəbəkələrdə fərqli dövrlərə aid videokadrlar əlavə edərək, həqiqəti əks etdirməyən müxtəlif xəbərlərin istinad mənbəyi olaraq nümayiş etdirildiyi müəyyən olundu. Görülən təxirəsalınmaz tədbirlərlə S.Rüstəmov saxlanılaraq istintaqa cəlb olundu və həmin videogörüntüləri çəkdiyi mobil telefon maddi sübut kimi götürüldü”.
Sonda qeyd edilib ki, “Azərbaycan Ordusunun hərbi birləşmələri, onların dislokasiyası, yerdəyişmələri, döyüş və səfərbərlik hazırlığı, silahları, hərbi texnikası ilə bağlı videokadrların çəkilib internetdə, o cümlədən sosial şəbəkələrdə yayımlanması cinayət məsuliyyəti yaradır və belə əməllərə yol verən şəxslər barəsində qanunvericiliklə nəzərdə tutulmuş hüquqi tədbirlərin görülməsi təmin ediləcəkdir”.
İlk şərhi yaza bilərsiniz