Qartal və Tülkü

BAYRAQDAR MEDİA təmsilçi şair, Xaçmazdakı Murad Qudyalçaylı adına “Ulduzlar” Ədəbi Məclisinin üzvü, təcrübəli pedaqoq Mehrəli QULUnun ən yeni təmsilini təqdim edir:

Yerdə bir daşın üstdə
Nəfəs dərirdi Qartal;
Səmalarda çox uçub
Olmuşdu bir az bihal…

…Tülkü uzaqdan görüb
Yaxınlaşdı Qartala;
Cəhdi bu idi, onu
Hiylə toruna sala!

Yaxınlaşıb söylədi:
-“Qartal, xoş gördük səni!
Səmadan yerə qonub,
Seyr edirsən çəməni?”..

Qartal dedi: “Uçşaq da
Yüksək ənginliklərə,
Biz hamımız bağlıyıq
Bu torpağa,bu yerə!

Tülki dedi: “Çox yaxşı
Edirsən, Qartal qardaş!
Onda en, düş torpağa
Oturaq, quraq bardaş.

Torpağı sevirsənsə,
Torpağa təmas elə;
Oturub söhbət edək
Biz ordan-burdan belə…

Qartal dedi: “Bənzətmə
Məni avam Qarğaya;
Bu torpağa bağlıdır,
Qonduğum bu daş, qaya!

Hiyləgər Tülkülərlə
Tutmaz mənim söhbətim;
O mavi səmalarda
Xoş keçər səyahətim!”…

…Qartal qanad çalaraq
Yenə qalxdı havaya;
Tülkünün bəd niyyəti
Puç olub getdi zaya!…

…Sonuncu dəfə baxdı
Tülkü daşa, qayaya;
Əmin oldu; “Qartallar
Bənzəməzlər Qarğaya!”…

25 fevral 2025. Bostançı, Xaçmaz