BAYRAQDAR MEDİA – Azərbaycan Pediatrlar Assosiasiyası (APA) 95 illik yubileyi ərəfəsində Sumqayıt şəhərində yeni istidadəyə verilən Muğam Mərkəzində gerçəkləşdirdiyi nüfuzlu bir konfransla həkim və mütəxəssisləri bir araya gətirib.
Bu barədə BAYRAQDAR MEDİA-ya Azərbaycan Pediatrlar Assosiasiyasından məlumat verilib.
Məlumata görə, Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB və Sumqayıt Şəhər İcra Hakimiyyətinin təşkilatı dəstəyi ilə “Pediatriyanın aktual problemləri” mövzusunda konfrans keçirilib: “Konfransda milli pediatriyanın qarşılaşdığı çətinliklər, ana və uşaq sağlamlığının mühafizəsi və müalicə sahəsində yeniliklər üzərində dayanılıb, uşaqların sağlamlıq vəziyyətini yaxşılaşdırmağa yönəldilmiş proqramlara dair əhəmiyyətli müzakirələr aparılıb. 200-dən artıq iştirakçının qatıldığı tədbir şəhidlərimizin əziz xatirəsinin bir dəqiqəlik sükutla yad edilməsi ilə başlayıb”.
Məlumatda deyilir ki, tədbiri giriş nitqi ilə Azərbaycan Pediatrlar Assosiasiyasının sədri, Avrasiya Uşaq Həkimləri Federasiyasının vitse-prezidenti, Azərbaycan Tibb Universitetinin II Uşaq xəstəlikləri kafedrasının dosenti, tibb üzrə fəlsəfə doktoru Təranə Tağı-zadə açıb: “Sədr Assosiasiyanın tarixi uğurları haqqında danışaraq, “95 illik tarixi müddətində APA ana və uşaq sağlamlığı sahəsində ölkə miqyasında əhəmiyyətli tədbirlər həyata keçirmişdir. Bu illər ərzində Assosiasiya çoxsaylı təlimlər təşkil edərək fəaliyyətinin bir istiqamətini mütəxəssislərin bilik və bacarıqlarını artırmağa yönəltmişdir. Eyni zamanda, təşkilat tibbi xidmətlərin keyfiyyətinin yüksəldilməsi məqsədilə standartların yaradılması və tətbiqində mühüm rol oynamış, ictimai maarifləndirmə kampaniyaları təşkil etmiş və cəmiyyət arasında bu mövzuda məlumatlılığın artırılmasına töhfə vermişdir” deyib”.
Konfransda, həmçinin millət vəkilləri Hicran Hüseynova, Müşfiq Məmmədli, Sumqayıt Şəhər İcra Hakimiyyəti başçısının müavini Ülviyyə Müzəffərova, tibbi qurumların rəhbərləri və alimlər çıxış ediblər. Konfrans Azərbaycan pediatriyasının mövcud problemlərinə və yeniliklərinə işıq salaraq, gələcək inkişaflara təkan vermək baxımından mühüm platforma kimi qiymətləndirilib.
İlk şərhi yaza bilərsiniz