Macarıstan səfiri ilə görüş

BAYRAQDAR MEDİA – Səhiyyə Nazirliyində (SN) Macarıstanın Azərbaycandakı fövqəladə və səlahiyyətli səfiri Tamaş Yojef Torma ilə görüş keçirilib.

Bu haqda xəbər BAYRAQDAR MEDİA-ya sözügedən Nazirliyin mətbuat xidmətindən daxil olub.

Xəbərdə bildirilir ki, “qonaqları salamlayan səhiyyə naziri Teymur Musayev iki ölkə arasında səhiyyə və tibb elmi sahəsində məhsuldar əməkdaşlıq əlaqələrinin mövcudluğunu qeyd edib. Nazirin sözlərinə görə, Azərbaycan və Macarıstan arasında səhiyyə sahəsində əməkdaşlıq beynəlxalq təşkilatlar, ilk növbədə Ümumdünya Səhiyyə Təşkilatı (ÜST) və Türk Dövlətləri Təşkilatı çərçivəsində həyata keçirilir. Əczaçılıq sənayesinin dövrün ən mühüm istiqamətlərindən biri olduğunu vurğulayan T.Musayev bu sahədə də əlaqələrin dinamik inkişaf etdiyini diqqətə çatdırıb. Çıxışının sonunda səhiyyə naziri gələcəkdə əməkdaşlığın daha da inkişaf etdiriləcəyinə əminliyini ifadə edib”.

Daha sonra xəbərdə deyilir ki, “Macarıstan səfiri öncə Bakı-Qroznı reysini həyata keçirən təyyarənin qəzaya uğraması nəticəsində çoxsaylı insan tələfatı ilə əlaqədar Azərbaycan xalqına başsağlığı verib. Dövlətlərarası əlaqələrin bütün sahələrdə, həmçinin səhiyyədə də yüksək səviyyədə olduğunu vurğulayan T.Y.Torma 2020-ci ildə Azərbaycan Səhiyyə Nazirliyi ilə Macarıstanın İnsan Resursları Nazirliyi arasında səhiyyə və tibb elmi sahəsində əməkdaşlıq haqqında Anlaşma Memorandumun imzalandığını qeyd edib. Son illər ölkələr arasında əczaçılıq sənayesində uğurlu əməkdaşlığın həyata keçirildiyini vurğulayan səfir tibb təhsili sahəsində də qarşılıqlı fəaliyyət üçün yeni imkanların yaradılmasını bildirib”.

Görüş zamanı səhiyyə və tibb elmi sahəsində Azərbaycan-Macarıstan əməkdaşlığının mövcud vəziyyəti və potensial inkişaf imkanları, həmçinin dərman və digər əczaçılıq məhsulları sahəsində ikitərəfli əməkdaşlığın perspektivləri müzakirə olunub.