Baş katibdən dəyərləndirmə

Son yeniləmə: 6 Yanvar 2025 10:47

2024-cü il Türk Dövlətləri Təşkilatı üçün əlamətdar il oldu

BAYRAQDAR MEDİA – Türk Dövlətləri Təşkilatının (TDT) Baş katibi Kubanıçbek Ömürəliyev 2024-cü il üçün dəyərləndirmə edib.

Bu barədə Veçernıy Bişkek məlumat yayıb.

Məlumata görə, Baş katib TDT-nin nailiyyətlərini ümumiləşdirərək, 2025-ci il üçün əsas prioritetləri və bir sıra mühüm məqamları qeyd edib: “Baş katib bildirib ki, 2024-cü il 15 illiyini qeyd edən TDT üçün türk dünyasının keçdiyi uğurlu yol və beynəlxalq aləmdə mövqelərinin möhkəmlənməsi baxımdan əlamətdar il olub”.

Bu addım təşkilatın daha da inkişafı və beynəlxalq nüfuzunun artırılması baxımından əhəmiyyətli oldu

Baş katib “2024-cü ilin ən mühüm hadisəsi TDT ölkələrinin əməkdaşlığı və xalqlar arasında əlaqələri gücləndirmək əzmini nümayiş etdirən Şuşadakı qeyri-rəsmi sammit oldu. Bundan əlavə, Bişkekdə keçirilən 11-ci sammitdə bütün üzv dövlətlər üçün birlik və tərəqqi simvoluna çevrilən yeni TDT bayrağı təsdiq edilib. Bu addım təşkilatın daha da inkişafı və beynəlxalq nüfuzunun artırılması baxımından əhəmiyyətli oldu” deyib.

TDT üzvü olan ölkələr arasında ticarət 24 faiz artıb

Saytın məlumatına əsasən, Kubanıçbek Ömürəliyev 2024-cü ilin nailiyyətlərindən danışaraq, bir neçə əsas istiqaməti vurğulayıb: “İqtisadi inteqrasiya baxımından TDT üzvü olan ölkələr arasında ticarət 24 faiz artaraq 38,3 milyard dollar təşkil edib. Mərkəzi Banklar Şurası da yaradıldı, TURAN iqtisadi zonası inkişaf etdirildi, xidmətlər və investisiyalar sahəsində Azad Ticarət Sazişi üzrə danışıqlar intensivləşdirildi. Rəqəmsal iqtisadiyyat sahəsində Tərəfdaşlıq Sazişinin imzalanması və Süni İntellekt Forumunun uğurla keçirilməsi mühüm nailiyyət oldu. Gələn il Bişkekin türk dünyasının rəqəmsal paytaxtı elan edilməsi regionun bu sahədəki uğurlarını vurğulayır”.

Məlumata görə, Baş katib TDT-nin Azərbaycanda keçirilən COP29 tədbirlərində fəal iştirak etdiyini, həmçinin iqlim dəyişikliyi ilə mübarizə və yaşıl texnologiyaların inkişafı üçün mühüm təşəbbüsləri özündə əks etdirən Türk Dünyasının Yaşıl Baxışını qəbul etdiyini vurğulayıb.

2025-ci il rəqəmsal transformasiya və təhlükəsizliyin təkmilləşdirilməsi dövrü olacaq

Baş katib qeyd edib ki, ən mühüm addımlardan biri fövqəladə hallar zamanı ölkələr arasında hərəkətlərin əlaqələndirilməsini təkmilləşdirməyə imkan verən Mülki Müdafiə Mexanizmi haqqında Sazişin imzalanması oldu. K.Ömürəliyev müraciətində qeyd edib ki, 2025-ci il iqtisadi əməkdaşlığın davamlı olaraq möhkəmlənməsi, rəqəmsal transformasiya və təhlükəsizliyin təkmilləşdirilməsi dövrü olacaq. O, həmçinin bütün TDT ölkələri üçün firavan və sabit gələcək üçün əsas olacaq davamlı inkişaf üzərində işin davam etdirilməsinin vacibliyini vurğulayıb”.