BAYRAQDAR MEDİA – Dekabrın 25-də Azərbaycana aid sərnişin təyyarəsinin Çeçenistanın Qroznı şəhəri üzərində raketlə vurulması artıq öz təsdiqini tapıb. Bununla bağlı rəqəmsal inkişaf və nəqliyyat naziri Rəşad Nəbiyevin də açıqlaması yetərincə ip ucu verir.
Lakin bəzi qüvvələr ciddi-cəhdlə olayı malalamaqla məşğuldur. Onlar Rusiyanı bu olayda sudan quru çıxarmağa çalışırlar. Hadisə baş verən andan araşdırmalar aparan və yetərincə məlumat toplayaraq ictimai rəyə ötürən siyasi şərhçi Azər Həsrət bu adamlara cavab sayılacaq paylaşım edib.
Paylaşımda deyilir:
Dostlar və izləyicilər. Baxıram ki, bəzi şəxslər Azərbaycan təyyarəsinin Qroznı üzərində vurulmasını malalamağa çalışırlar. Guya səhvən olubmuş, guya ümumi müdafiə tədbirləri çərçivəsində Azərbaycan təyyarəsi də hədəfə çevrilibmiş və s…
Bunların hamısı nağıldır və məqsədli şəkildə edilir. Neçə gündür deyirəm və yazıram: havadan müdafiə tədbirləri həyata keçirilən əraziyə mülki təyyarəni Rusiya niyə buraxıb? Axı belə tədbirlər varsa, elə Mahaçqalaya çatmamış bizim təyyarəmizi hava limanına endirə və ya Bakıya qaytara bilərdilər. Etməyiblər bunu!
İkinci məqam: AZAL təyyarəsinin GPS əlaqəsi Mahaçqalaya çatmamış tam olaraq əngəllənib! Yəni artıq bizim təyyarə radarlarda görünmədən Qroznıya uçub! Niyə Rusiya GPS-i Qroznıdan xeyli aralıda əngəlləyib? Niyə ona qədər bizim təyyarəyə xəbər verilməyib?
Üçüncü məqam: Təyyarəyə sarı ən azı iki, hətta üç raket atıldığı aşkar olunur! Lap tutaq ki, biri səhvən atılıb, digərləri niyə atılıb?
Dördüncü məqam: Təyyarə vurulduqdan sonra onu yaxın hava limanlarından heç birinə buraxmayaraq qardaş Qazaxıstanın Aqtau hava limanına göndəriblər! Ki, artıq vurulmuş təyyarə Xəzər dənizinə düşsün, bununla da bütün şahidlər ölsün, sübutlar da itirilsin!
Ən əsası: Rusiya bu təyyarəni məqsədli şəkildə vurub! Plan bu olub ki, təyyarəni vurub dənizdə batıracaqlar, isti-isti təbliğat quracaqlar ki, Ukrayna PUA-sı hətta Azərbaycan mülki təyyarəsini vurdu! Məqsəd də Azərbaycan-Ukrayna qarşıdurması yaratmaq olub!
Alınmadı!
AZAL-ın qəhrəman pilotlarının peşəkarlığı və dəyanəti sayəsində Rusiyanın bu çirkin planı faş oldu və hətta insanların bir qismi də hadisədən sağ qurtuldu!
Ona görə də, lütfən, heç kim bu olayı malalamağa qalxışmasın!
Hadisənin birbaşa səbəbi və planlayanı Kremldir! Özü də bu əməliyyatdan hətta Rusiya Prezidenti Vladimir Putinin xəbərinin olduğuna şübhə etmirəm!
