Gənclərlə bağlı daha bir layihə reallaşıb

Son yeniləmə: 18 Dekabr 2024 08:31

BAYRAQDAR MEDİA – “Region gənclərinin şəxsi inkişaf və məşğulluq probleminin həllinə dəstək” layihəsi ilə qalib olan “Azərbaycan-Avropa Gənclərinin Əməkdaşlığı” İctimai Birliyi, 15 dekabr 2024-cü il tarixində Lənkəran Gənclər Evində 3 seminar həyata keçirib. Qeyd edək ki, layihə Gənclər və İdman Nazirliyinin gənclər təşkilatlarının fəaliyyətlərinin dəstəklənməsi məqsədi ilə 2024-cü il üzrə elan edilmiş qrant müsabiqəsi çərçivəsində reallaşıb.

Bu barədə BAYRAQDAR MEDİA-ya İctimai Birlikdən məlumat verilib.

Məlumata görə, tədbiri təşkilatın sədri Orxan Əlixanlı giriş nitqi ilə açaraq, göstərilən dəstəyə görə Respublikası Gənclər və İdman Nazirliyinə, iştiraka görə gənclərə təşəkkürünü bildirib: “O, layihənin məqsədi barədə məlumat verib. Qeyd edilib ki, layihənin məqsədi, region gənclərinin fərdi bilik və bacarıqlarının artırılmasına, şəxsi inkişaf, karyera quruculuğunda praktik təcrübələrin artırılmasına dəstək olmaqdan ibarətdir. Həyata keçirilən 3 tədbir zamanı layihənin eksperti tərəfindən gənclərə şəxsi inkişafın praktiki metodları, iş axtarışı, məşğulluq, fərdi işin başlanması, müvafiq sahənin inkişafı ilə bağlı dövlət proqramları və onlardan istifadə və ya iştirak etmək qaydaları istər nəzəri, istərsə də praktiki qaydada öyrədilib. Layihə çərçivəsində çap olunmuş kitabçada karyera planlaması, mərhələləri, işaxtarma üsulları, CV yazılma qaydası, növləri, müsahibə mərhələsinə hazırlıq və s. məlumatlar öz əksini tapıb”.

O.Əlixanlı vurğulayıb ki, qeyd olunan bölmələr üzrə praktiki məşğələlər və komanda işinin qurulması həyata keçirilib: “Gənclər bu sahədə üzləşdikləri problemlərdən danışaraq həm qazandıqları təcrübələrdən, həm də ekspert tərəfindən qeyd olunan problemlər ilə bağlı həll yolları barəsində məlumatlandırılıblar”.

Sonda Gənclər və İdman Nazirliyinin sektor müdiri Elşən Qəhrəmanov, nazirliyin son illərdə gənclər sahəsində gördüyü işlərdən və gələcək planlardan gəncləri məlumatlandırıb və iştiraka görə təşəkkürünü bildirib. Layihə iştirakçılarına sonda sertifikatlar təqdim edilərək xatirə şəkli çəkdirilib.