BAYRAQDAR MEDİA – Bakı Dövlət Universitetində (BDU) görkəmli alim və mətbuat tədqiqatçısı, Prof. Şirməmməd Hüseynovun 100 illik yubileyinə həsr olunmuş “Azərbaycan mediası: tarix və müasirlik” mövzusunda Beynəlxalq elmi-praktiki konfrans keçirilib.
Bu haqda xəbər BAYRAQDAR MEDİA-ya BDU-nun mətbuat xidmətindən daxil olub.
Xəbərdə qeyd edilir ki, “tədbirdən əvvəl konfrans iştirakçıları Fəxri xiyabanda Ş.Hüseynovun məzarını ziyarət ediblər. Görkəmli alimin xatirəsi ehtiramla yad olunub. Sonra konfrans iştirakçıları BDU-nun Jurnalistika fakültəsinin Milli mətbuat tarixi kafedrasında Ş.Hüseynovun xatirəsinə həsr olunmuş guşə ilə tanış olublar. Tədbir BDU-nun akt zalında davam edib. Konfransın açılışında çıxış edən BDU-nun rektoru Elçin Babayev bildirib ki, Ş.Hüseynov görkəmli mətbuat tədqiqatçısı, nüfuzlu alim, unudulmaz müəllim kimi şərəfli bir ömür yaşayıb. Sonra professorun həyat və yaradıcılığına həsr olunmuş videoçarx nümayiş olunub”.
Daha sonra xəbərdə, “Türkiyənin Üsküdar Universitetinin rektoru Nazife Güngör, Milli Məclisin deputatı, Bakı Slavyan Universitetinin Jurnalistika kafedrasının müdiri Vüqar Rəhimzadə, Mətbuat Şurasının sədri, “525-ci qəzet”in baş redaktoru Rəşad Məcid, “ARB24” telekanalının direktoru Radik İsmayılov, “Xalq qəzeti”nin baş redaktoru Əflatun Amaşov, BDU-nun Milli mətbuat tarixi kafedrasının müdiri Cahangir Məmmədli, Multimedia və elektron kommunikasiya kafedrasının müdiri Qulu Məhərrəmli, Jurnalistika fakültəsinin dekanı Vüqar Əliyev çıxışlarında elmi-pedaqoji fəaliyyətini ləyaqətlə, vicdanla, təmənnasız və peşəkarlıqla yerinə yetirdiyini bildirib, xatirələrini bölüşüblər” deyə qeyd edilir.
Sonda görkəmli alimin qızı, Azərbaycan Milli Konservatoriyasının elmi işlər üzrə prorektoru, Prof. Lalə Hüseynova çıxış edərək konfransın təşkilinə görə minnətdarlığını bildirib. O qeyd edib ki, Ş.Hüseynov öz xalqını çox sevən, son dərəcə dürüst və təmiz insan idi: “Biz onunla daim qürur duymuşuq və özümüzü Şirməmməd Hüseynovun məsləkdaşı hesab etmişik. Çox sevinirəm ki, atamın yetirmələri, tələbələri də bu yolla gedirlər”.
Konfrans işini bölmə iclasları ilə davam etdirib.
İlk şərhi yaza bilərsiniz