BAYRAQDAR MEDİA – ADA Universiteti, ADA Universiteti Fondu (ADAF) və “PAŞA Bank” qadınların peşəkar inkişafını dəstəkləmək, onlara müasir əmək bazarının tələblərinə uyğun bacarıqlar qazandırmaq üçün yeni sosial layihəyə başlayır.
Bu haqda xəbər BAYRAQDAR MEDİA-ya ADA-nın mətbuat xidmətindən daxil olub.
Xəbərdə bildirilir ki, “layihənin hədəf kütləsi müxtəlif sahələrdə biznes fəaliyyəti ilə məşğul olan sahibkar qadınlardır. Qadınların sosial həyatdakı önəmini, biznes mühitinin inkişafına təsirini nəzərə alaraq irəli sürülən bu layihə onları müsbət istiqamətdə dəyişimə, tərəqqiyə təşviq edir. Həmçinin qadınları cəmiyyətin inkişafına fayda verən aparıcı qüvvələrə çevrilməyə, yalnız özləri üçün deyil, digərləri üçün də faydalı olmağa ruhlandırır”.
Sonra xəbərdə, “bu məqsədlərə nail olmaq üçün layihə çərçivəsində müxtəlif mövzularda sessiyalar olacaq. Belə ki, maliyyə, liderlik, kommunikasiya, sahibkarlıq və digər mövzularda bilik və bacarıqların artırılması üçün millət vəkillərinin, eləcə də korporativ sektordan olan peşəkarların iştirakı ilə interaktiv təlimlər təşkil ediləcək. Bununla yanaşı, qadınların yaradıcı qabiliyyətlərinin, mənəvi keyfiyyətlərinin aşkarlanmasına dəstək göstərən incəsənət və yoqa dərsləri də keçiriləcək” deyə vurğulanır
ADA Universiteti Fondunun Sponsorluq layihələri şöbəsinin direktoru Firuzə İsmayıl Əliyeva bildirib: “Daimi tərəfdaşlarımızla birgə ötən ildən etibarən üzərində işlədiyimiz bu layihə qadınların sosial və peşəkar mühitdə rolunu gücləndirməyi və onları öz səriştələri ilə cəmiyyətə əlavə dəyər gətirən şəxslərə çevirməyi hədəfləyir.”
