Azərbaycandan KKTC-nin tanınmış mədəniyyət xadiminə iki mükafat

Son yeniləmə: 10 Dekabr 2024 10:03

Ersin Tunay: Hesab edirəm ki, bu, türk dünyası mədəniyyətinə verdiyimiz töhfənin önəmli olduğunun ifadəsidir

BAYRAQDAR MEDİA – Kuzey Kıbrıs Türk Cümhuriyyəti (KKTC) ilə Azərbaycan arasında əlaqələrin inkişafı istiqamətində davamlı addımlar atılır. Bu sahədə mədəniyyət xadimlərinin rolu da danılmazdır. Onlardan biri də KKTC-də fəaliyyət göstərən Çağdaş Müzik Derneğinin başqanı və tanınmış xor dirijoru Ersin Tünaydır.

Azərbaycanda və digər türk dövlətlərində bir çox mədəni proqramların təşkilatçısı kimi də tanınan Ersin Tünayın musiqi sahəsindəki uğurları türk musiqisinin beynəlxalq arenada daha yaxşı təmsil olunmasına töhfə verir.

Qeyd edək ki, sənətçi ötən həftə yenidən Bakıda səfərdə olub. Bu dəfəki səfərin məqsədi isə onun təltif edildiyi mükafatların təqdimat mərasimində iştirak etmək olub.

Bu barədə BAYRAQDAR MEDİA-ya özəl açıqlamasında Ersin Tünay özü məlumat verib: “Avand Production ve Mingəçevirdəki Üzeyir Hacıbəyli adına Musiqi Məktəbinin qərarı ilə xüsusi mükafatlarla təltif edilmişəm. Bakıya bu səfərimdə də məqsəd həmin iki mükafatın – “Türk dünyası mədəniyyət sənət ödülü” və “Türk dünyası mədəniyyət və sənət xidmət ödülü”nün təqdimat mərasimində iştirak etmək idi. Qırx il ərzində mədəniyyət və incəsənət sahəsindəki xidmətlərimin qardaş Azərbaycandakı müvafiq qurumlar tərəfindən belə qiymətləndirilməsi üçün çox xoşbəxtəm. Hesab edirəm ki, bu, türk dünyası mədəniyyətinə verdiyimiz töhfənin önəmli olduğunun ifadəsidir”.

Ersin Tünay mükafatlandırılma mərasiminin başqa bir baxımdan da əhəmiyyətli olduğunu deyib: “Mükafatın Bakıda verilməsi türk dünyasının müxtəlif coğrafiyalarında yaşayan sənətçilərin bir araya gələrək bir-birini dəyərləndirməsinin göstəricisi kimi qiymətləndirilməlidir. Digər tərəfdən bu cür mükafatlar türk dünyası mədəniyyətinin daha da güclənməsinə və yayılmasına öz töhfəsini verir. Nəhayət onu da deyim ki, sənətçilər işlərinə görə qiymətləndirilərkən daha həvəslənir və daha yaxşı əsərlər yaradırlar”.

Ersin Tünay BAYRAQDAR MEDİA-ya açıqlamasında onu da vurğulayıb ki, müxtəlif ölkələrin qurumlarının bir sənətçiyə mükafat verməsi türk dünyası ölkələri arasında mədəni əməkdaşlığın nə qədər əhəmiyyətli olduğunu göstərir”.

Beləliklə, türk dünyasının mədəniyyət və incəsənət sahəsində mühüm hadisənin baş verdiyini göstərən bu mənalı mükafatlar həm sənətkarın uğurlarını, həm də türk dünyası mədəniyyətinin əhəmiyyətini bir daha ortaya qoyur.