Dr. Yücel Karauz: TDT dövlət başçılarının növbəti zirvə görüşünə kimi ilkin addımlar atılmalıdır
BAYRAQDAR MEDİA – “Bakıda keçirilən COP29 bir çox məqamlarına görə tarixdə qalacaq. Hesab edirəm ki, COP29 türk dünyası üçün də bir sıra mühüm addımlarla mühüm əhəmiyyət kəsb edən tədbir kimi xatırlanacaq. Mən bu istiqamətdə Türk Dövlətləri Təşkilatına daxil olan üzv və müşahidəçi ölkələrin QHT-lərinin iştirakı ilə COP29 çərçivəsində Bakıda mühüm tədbir keçirilməsini xüsusi olaraq qeyd etmək istəyirəm”.
Bunu BAYRAQDAR MEDİA-ya özəl açıqlamasında Türkiyənin Azərbaycandakı sabiq hərbi attaşesi, ehtiyatda olan general Dr. Yücel Karauz bildirib.
Onun sözlərinə görə, bu tədbir iki baxımdan önəmli idi: “Məlum olduğu kimi COP29 çərçivəsində Yaşıl Zonada Türk Dövlətləri Təşkilatına üzv və bu təşkilatda müşahidəçi statusa malik 8 ölkədən olan QHT-lər birgə iqlim təşəbbüslərinə dair forum keçirib. Azərbaycan, Türkiyə, Özbəkistan, Qazaxıstan, Qırğızıstan, Macarıstan, Kuzey Kıbrıs Türk Cümhuriyyəti və Türkmənistandan olan vətəndaş cəmiyyəti təsisatlarından nümayəndələr foruma qatılıb. Bu tədbirin birinci önəmi ondan ibarət idi ki, bu türk dünyasının bəşəriyyəti narahat edən məsələlərə etinasız yanaşmadığını bir daha ortaya qoydu. İkinci önəmə gəlincə, ilk dəfədir ki, türk dövlətlərinin QHT-ləri ümumi məqsəd uğrunda bu səviyyədə təşkilatlanmağa başlayıb. Ümumiyyətlə bu təşkilatlanma prosesi daha da sürətləndirilməlidr. Hesab edirəm ki, türk dünyası QHT-lərinin ortaq festivalları, konfransları, seminarlaır keçirilməlidir”.
Türkiyəli general bu qənaətdəri ki, QHT-lər eyni zamanda TDT daxilində qəbul edilən qərarların formalaşmasında da mühüm rol oynaya bilər: “QHT-lər arasında istişarələr, məsləhətləşmələr eyni zamanda dövlət qurumlarına məsləhət xarakterli hansısa hesabatların, proqramların təkliflərin təqdim olunmasına da gətirib çıxara bilər. Məlumat üçün bildirim ki bu ənənə artıq qlobal dünyada mövcuddur”.
Dr. Y.Karauz deyib ki, ümumiyyətlə QHT sektorunun vahid platformada çıxış etməsi vacibdir və bu məsələ gecikmək olmaz: “Hesab edirəm ki, TDT dövlət başçılarının növbəti zirvə görüşünə kimi ilkin addımlar atılmalı, həmin zirvə görüşündə isə bu istiqamətdə mühüm qərarlar qəbul edilməlidir. Yoxsa türk dövlətləri təşkilatının həyata keçirdiyi vahid strategiya tam olmayacaq. Ən azı bu bəhs etdiyim sahədə bir boşluq yaranacaqdır”.
