Son yeniləmə: 30 Noyabr 2024
BAYRAQDAR MEDİA – Məktəblilərin skaut sıralarına cəlb edilməklə daha sağlam yetişməsinə töhfə verəcək yeni layihənin təqdimatı keçirilib.
Xaçmazdakı 7 nömrəli tam orta məktəbdə rayon ictimai fəallarının da iştirakı ilə keçirilən təqdimat maraqla qarşılanıb.
Layihənin rəhbəri, rayonun Cığatay kənd ibtidai məktəbinin müəllimi Vəfa Musayeva bildirib ki, “Təhsildə inkişaf və İnnovasiyalar üzrə VIII qrant müsabiqəsi”nin qalibi olub. Onun “Skaut məktəblərinin qeyri-formal təhsilə əsaslanan yay məktəbi” adlı layihəsi bəyənilib. Sözügedən layihəni Elm və Təhsil Nazirliyi maliyyələşdirir.
Vəfa Musayeva layihə haqqında danışaraq deyib ki, fəaliyyət proqramı çərçivəsində məktəb yaşlı uşaqların özgüvənini artırmaq, onları müstəqil həyata alışdırmaq, eyni zamanda ictimai həyata hazırlamaq üçün tədbirlər görüləcək. O, qeyd edib ki, layihə çərçivəsində rayonun Nabran kəndi ərazisində yay düşərgəsi də təşkil ediləcək.
Təqdimatda çıxış edənlər maraqlı və vacib layihə ilə bağlı öz fikirlərini bölüşüblər. Çıxışçılar qeyd ediblər ki, uşaqların zərərli vərdişlərdən uzaq tutulması baxımından belə layihələr çox əhəmiyyətlidir.
Çıxışlarda Elm və Təhsil Nazirliyinin, ümumiyyətlə Azərbaycan dövlətinin bənzər fəaliyyətləri təşviq etməsi xüsusi vurğulanıb. Bildirilib ki, dövlət yeni nəslin daha sağlam yetişməsində, milli vətənpərvərlik ruhunun ayaqda tutulmasında çox maraqlıdır.
O da ayrıca vurğulanıb ki, Azərbaycan uşaq və gənclərinin daha üstün şəkildə yetişməsi, dünyaya inteqrasiyada seçilməsi və bəşəriyyətə faydalı olması baxımından belə layihələr əvəzsizdir.
Çıxışçılar və iştirakçılar Vəfa Musayevaya yeni layihəsində uğurlar diləyib, bu nəcib işi davam etdirməsini arzuladıqlarını bildiriblər.
Təqdimatda Xaçmaz Rayon İcra Hakimiyyətinin Qazilər və şəhid ailələri ilə iş şöbəsinin müdiri Tariyel Didarov, Quba-Xaçmaz Regional Gənclər və İdman İdarəsi Xaçmaz rayonu üzrə gənclər və idman sektorunun gənclərlə iş üzrə baş məsləhətçisi Nizami Mustafayev, Xaçmaz Tarix Diyarşünaslıq Muzeyinin direktoru Pakizə Mehdiyeva, Xaçmaz Heydər Əliyev Mərkəzinin direktoru Könül Əsgərova, Xaçmaz Xalça Muzeyindən Pərzad Çərkəzova və Dilarə Rüstəmova, “Xaçmaz” qəzetinin jurbnalisti Gülxar Rəhimli, Zərifə Əliyeva adına 8 nömrəli məktəb-liseyin (Xaçmaz) tarix müəllimi, Azərbaycan Skautlar Assosiasiyasının rayon müvəkkili Aygün Rəşidova, eyni Assosiasiyanın regional müvəkkili Ceyhun Fərzəliyev, Xaçmaz MKS uşaq şöbəsinin nümayəndələri Gülşən Ahmatova və Leyla Didarova, Qarabağ qaziləri – döyüşçülər Aydın Fətiyev, Zeynal Məmmədov və Rüstəm Bağırov, tələbə-skaut Yusif Məmmədli və Əməkdar jurnalist Azər Həsrət iştirak və çıxış edib.
