BAYRAQDAR MEDİA – Dekabrın 6-sı saat 19:00-da İstiqlaliyyət 31 ünvanında “Rabitə” adlı sərginin açılışı olcaq.
Sərgi Azərbaycan Rəssamlar İttifaqının və Birləşmiş Rəssamlar Klubunun dəstəyi, Çardaq Art-platformasının təşkilatçılığı ilə keçiriləcək.
Sərgi haqqında Çardaq Art-platformasının rəhbəri rəssam Elşən Karaca BAYRAQDAR MEDİA-ya danışıb: “Ölkəmizdə 6 dekabr Rabitə və İnformasiya texnologiyaları işçilərinin peşə bayramı olaraq qeyd edilir. Biz də Çardaq Art-platforması olaraq növbəti layihəmizi məhz bu gözəl peşə bayramına həsr etmişik. Rabitə dedikdə sənətçilərimizin mövzu ilə bağlı çox maraqlı fikirləri yarandı və düşündük ki, niyə də bu mövzuda yaradıcılıq sərgisi keçirtməyək?”.
Rəssam rabitə və informasiyanın hər birimizin həyatında önəmli yer tutduğunu bildirərək uşaqdan böyüyə hər kəsin bu önəmli sahənin istifadəçisi və bir parçası olduğunu əlavə edib: “Ona görə biz yaradıcı insanlar olaraq bu peşənin insanlarının gördükləri işlərin cəmiyyət üçün istər maddi, istərsə də mənəvi nə qədər önəmli olduğunu bu sərgi vasitəsi ilə göstərməyə çalışırıq. Fürsətdən istifadə edərək bütün bu sahədə çalışan insanların peşə bayramını təbrik edirik. Qeyd edim ki, sərgiyə giriş sərbəstdir”.
E.Karaca sərgidə 12 rəssamın mövzu ilə bağlı öz yeni əsərlərini nümayiş etdirəcəyini, həmçinin rəsm əsərlərindən əlavə, poeziya və musiqi nömrələri də səsləndiriləcəyini vurğulayıb.
