Tennur Türk: Torpaq istehsal oluna bilmədiyi üçün həmişə qiymətli və gəlirli olur
BAYRAQDAR MEDİA – “Mən sizin vasitənizlə Azərbaycandan olan bacı-qardaşlarımıza, xüsusilə Türkiyədə torpaq sahəsinə sərmayə qoymaq istəyənlərə bəzi vacib məqamlar barədə məlumat vermək istəyirəm. Daha doğrusu Türkiyədəki torpaq sərmayəsinin dinamikası və Türkiyə bazarları haqqında danışmaq istərdim”.
Bunu BAYRAQDAR MEDİA-ya Türkiyədə daşınmaz əmlak üzrə mütəxəssis Tennur Türk deyib.
O, qeyd edib ki, torpaq istehsal oluna bilmədiyi üçün həmişə qiymətli və gəlirli olur: “Qızıl və xarici valyuta kimi mallar pulunuzun dəyərini qoruyub saxlasa da, torpaq həmişə real gəlir gətirir. Türkiyədə 2024-cü ildə torpaq satışları 2023-cü ilə nisbətən əhəmiyyətli dəyişikliklər göstərir”.
Onun sözlərinə görə, Türkiyədə 2023-cü ildə yaşanan iqtisadi dalğalanmalar torpaq satışlarına da təsir edib: “2024-cü ildə bərpa əlamətləri olsa da, yüksək inflyasiya və valyuta məzənnələrindəki dalğalanmalar təsir etməkdə davam edir. Bu vəziyyət alıcıların investisiya qərarlarını ləngidir. Düzdür, 2024-cü ildə xüsusilə kənd təsərrüfatı torpaqlarına investisiya tələbləri artır. Qida təhlükəsizliyi və davamlı kənd təsərrüfatı təcrübələri investorların diqqətini cəlb edir. Şəhərdən kənarda torpaq axtarışları da kəndə meyli artırır. Hesab edirəm ki, 2024-cü ildə bır sıra layihələrin davam etdirilməsi və yeni layihələrin başlanması şəhərdə torpaq satışına müsbət təsir göstərə bilər. Digər tərəfdən dövlət kənd təsərrüfatı və investisiya təşviqləri, xüsusilə gənc fermerlər üçün layihələr torpaq satışının artmasına kömək edir. Bu dəstəklər kənd təsərrüfatı torpaqlarına marağı artırır”.
Tennur Türk vurğulayıb ki, torpaq qiymətlərinin 2023-cü ilə nisbətən 2024-cü ildə ümumiyyətlə artacağı müşahidə edilir: “Bununla belə, torpaq növləri arasında regional fərqlər və nəzərəçarpacaq fərqlər var. Kənd təsərrüfatı təyinatlı torpaqlar, yaşayış binalarına yaxın torpaqlar kimi, yerləşdiyi yerə görə dəyər qazanır”.
Eksper, sonda “Nəticədə bizim proqnozlarımız belədir: Torpaq satışları 2024-cü ildə 2023-cü illə müqayisədə daha dinamik görünüşə malikdir. Bununla belə, iqtisadi qeyri-müəyyənliklər investorların qərar qəbul etmə proseslərinə təsir etməkdə davam edir. Uzunmüddətli planlaşdırma və davamlılığa yönəlmiş investisiyalar sektorda qazanc potensialını artıra bilər. Yəni 2024-cü il torpaq alqı-satqısı baxımından fürsətlərlə dolu bir dövr kimi diqqət çəkir, lakin diqqətli təhlil və strateji qərarlar həyati əhəmiyyət kəsb edir. Deməli, hazırda Türkiyədə torpaq investisiya imkanlarını mütləq dəyərləndirilməli, lakin ekspert rəyi almadan hansısa adıdm atılmamalıdır” deyib.
