Son yeniləmə: 25 Noyabr 2024 10:48
BAYRAQDAR MEDİA – Türkiyənin iki qitəni birləşdirən möhtəşəm şəhəri İstanbul Yeni ili romantik və unudulmaz etmək istəyən cütlüklər üçün ideal məkandır.
Türkiye Turizm Tanıtım ve Geliştirme Ajansından (TGA) BAYRAQDAR MEDİA-ya verilən məlumatda belə deyilir.
Bildirilir ki, “Bosforun sehrli sularında gəmi turu, Şahzadə Adalarının sakitliyində istirahət, tarixi qüllələrin zirvəsində xatirələrə yazılacaq anlar, Michelin ulduzlu restoranlarda romantik bir şam yeməyi yeni ilinizi unudulmaz edəcək. adaladıqlarımız İstanbulun füsunkar gözəlliyini hiss etmək üçün mükəmməl seçimlərdir. Gəlin, Yeni il tətiliniz zamanı İstanbulda sizi nələrin gözlədiyini kəşf edək!”
Kəşf etdikcə heyran qalacağınız İstanbul
Məlumatda daha sonra deyilir: “Yeni il səfərinizə başlamazdan əvvəl, bol çeşidli, həm şirin, həm də duzlu təamlardan ibarət zəngin bir türk səhər yeməyi və yaxşı dəmlənmiş çayla günə enerji qatın. Kəşf etdikcə heyran qalacağınız İstanbul, aşiq cütlüklər üçün bənzərsiz bir şəhərdir. Memarlıq möcüzələri, rəngarəng küçələri və sənət incisi muzeyləri ilə bu şəhər ən gözəl əl-ələ dolaşaraq kəşf olunur”.
Vurğulanir ki, şəhərin ən romantik simvollarından olan Qalata və Qız Qüllələri bu səfərdə mütləq yolunuzu gözləyir: “Qalata Qülləsinə birlikdə ilk dəfə qalxanların bir gün evlənəcəyinə dair məşhur bir rəvayət var. Bosforun ortasında zərif bir qız kimi dayanan Qız Qülləsi isə bu gözəl şəhərin bütün cazibəsini özündə əks etdirir və muzey kimi yenidən ziyarətçilərini qəbul edir”.
Bildirilir ki, “günün sonunda 2025-ci ilin qarşılanmasını İstanbulun məşhur “meyxana”larında rakı ilə qeyd edə bilərsiniz. Yerli meyxanalarda İstanbulun ən ləziz balığı, müxtəlif məzələr və canlı musiqi ilə unudulmaz bir gecə sizi gözləyir. Bu, yalnız İstanbula məxsus yerlərdir!”
Yeni İli fərqli və yaddaqalan şəkildə qarşılamaq istəyirsinizsə…
Məlumatda qeyd edilir ki, Yeni İli fərqli və yaddaqalan şəkildə qarşılamaq istəyirsinizsə, səfərinizi Bosfor boğazında unudulmaz bir dəniz macərasına çevirə bilərsiniz: “Anadolu ilə Avropanı birləşdirən bu möhtəşəm boğazda üzmək, İstanbula gələn hər turistin xəyalıdır. Şəhərin füsunkar mənzərələrini seyr etmək üçün Bosforun sularında gəzinti turlarına qatılmaq və ya yerlilərlə birlikdə bir bərə səyahətinə çıxmaq ən gözəl seçimlərdən biridir. Gəmi səyahətiniz boyunca bir “simit” götürüb qağayıları bəsləmək isə sizin səfərinizə nostalji bir rəng qatacaq”.
Bu macəranı daha da maraqlı etmək üçün cütlük olaraq qayıqla avar çəkmək, kano sürmək və ya su velosipedi ilə Bosforun büllur sularında əsl sərgüzəşt yaşaya bilərsiniz: “Təcrübəli təlimçilərin rəhbərliyi altında bu gəzinti zamanı əsrarəngiz köşklərin önündən keçəcək, İstanbulun tarix dolu abidələrinə heyranlıqla tamaşa edəcəksiniz. Axşam isə ulduzların işığında Bosforun sakit sularında yaxtaya minərək Yeni ili qarşılamaq üçün yola çıxın. Özəl bir masada romantik bir şam yeməyi ilə başlayan bu axşam, canlı musiqi və şənliklərlə Yeni İl ruhuna bürünəcək. Bosforun sehrli atmosferində keçirilən belə bir gecə ürəklərdə silinməz bir xatirəyə çevriləcək!”
Bu adalar romantizmi və sakitliyi bir arada təqdim edir
Lakin bu da son deyil: “Əgər Yeni ildən əvvəl bir az tək qalmaq, şəhərin səs-küyündən uzaqlaşmaq istəyirsinizsə, İstanbulun yaxınlığında yerləşən Şahzadə Adaları mükəmməl bir seçimdir. Bu adalar romantizmi və sakitliyi bir arada təqdim edir. Burada, adanın möhtəşəm mənzərələrinə heyran qalacağınız butik otellərdən birində qalmağı seçə bilərsiniz. Adanın sükunətində əl-ələ gəzərkən, tarixi malikanələrin arasından keçib, heyrətamiz mənzərələri izləyə bilərsiniz. İstəsəniz, velosipedlə adaları kəşf etmək də başqa bir əyləncəli alternativdir. Görməli yerləri ziyarət etdikdən sonra, sahil boyunca bir balıq restoranında Yeni ili qarşılamaq isə bu romantik tətilin zirvəsi olacaq. Mövsümi təzə balıqlar, zəngin Türk məzələri, salatlar və rakı ilə bəzənmiş bir axşam şənliyi, bu gecəni unudulmaz edəcək”.
Yeri gəlmişkən, İstanbulda Yeni ili daha fərqli və unikal şəkildə keçirmək istəyənlər üçün şəhərin məşhur hamamlarında rahatlamaq gözəl bir seçim ola bilər.
Türk hamamının verdiyi təcrübəni yaşadıqdan sonra, yerli mətbəxlə tanış olmaq mütləqdir: “Küçə yeməkləri ilə mədəninizi şənləndirə bilər və günün sonunda sahil boyu restoranlarda şam edə bilərsiniz. İstanbulun Michelin ulduzlu restoranları Yeni ili şirin bir başlanğıc ilə qarşılamağı vəd edir”.
Bayram əhval-ruhiyyəli İstanbul
TGA-nın məlumatında vurğulanır ki,İstanbul, bayram mövsümündə öz sehrini daha da artırır: “İstiklal Caddəsi, Nişantaşı və Kadıköy kimi məşhur məkanlar, bayram işıqları ilə bəzənərək, şəhərin enerjisini başqa bir səviyyəyə qaldırır. İstiklal Caddəsi boyunca hər bir mağaza bəzədilib, küçələr bayram əhval-ruhiyyəsi ilə dolur. St. Antuan Kilsəsi, böyük Yeni il ağacı, güllər və şamlarla ziyarətçiləri qarşılayır, Nişantaşında isə ən trend Yeni il ağacı göz oxşayır. Kadıköy isə Yeni il temalı şirniyyat dükanları ilə diqqət çəkir. Burada, şokolad qutuları, Santa Claus fincanları və şəkilli konfetlərdən tutmuş, bayram hədiyyələrinə qədər hər şey tapmaq mümkündür. Bu yerlərdə gəzişərək bayram əhval-ruhiyyəsini yaşamaqla yanaşı, həm də ən gözəl gecə yeməyi məkanlarını kəşf etmək mümkündür. İzdihamla Yeni ili qarşılaya bilərsiniz və ya
zərif barlarda və dam terraslarında unudulmaz şənliklərdə iştirak edə bilərsiniz. İstanbulun bayram havası, hər kəsə özünə məxsus unudulmaz bir təcrübə təqdim edir. Yeni ili coşğu ilə qarşılamaq və ya zərif barlar və dam terraslarında unudulmaz şənliklərə qatılmaq isə bu möhtəşəm atmosferi tamamlayacaq”.
İlk şərhi yaza bilərsiniz