Vüqar İskəndərov: COP29 kimin kim olduğunu, hansı qüvvələrin qaranlıq məqsədlərə xidmət etdiyini bir daha ortaya qoydu
BAYRAQDAR MEDİA – “Dünya bir daha Batının ikiüzlü, insanlığın gələcəyi üçün deyil, qaranlıq maraqların təmin olunmasına xidmət edən siyasət yürütdüyünün şahidi oldu. Əgər belə olmasaydı vəhşi Batı dünyanın bu günü və sabahını düşündürən ekoloji məsələlərin, yaşıl enerjiyə keçidin, iqlim dəyişikliyi ilə mübarizənin bütün aspektlərini özündə əks etdirən COP29 kimi tədbiri də siyasiləşdirməyə, daha dəqiq desək, qaranlıq, çirkin maraqların girovuna çevirməyə cəhd etməzdi”.
Bunu BAYRAQDAR MEDİA-ya açıqlamasında Milli Məclisin deputatı Vüqar İskəndərov deyib.
O, qeyd edib ki, əslində, COP29 kimin kim olduğunu, hansı qüvvələrin qaranlıq məqsədlərə xidmət etdiyini bir daha ortaya qoydu: “Artıq daha bir tarixi proses arxada qaldı. Azərbaycan COP29-a yüksək səviyyəli ev sahibliyi etməklə daha bir tarix yazdı. Azərbaycan həm də bir daha üzərinə götürdüyü öhdəlikləri məsuliyyətlə yerinə yetirmək nümunəsi sərgilədi. Bütün maneçiliklərə baxmayaraq, Azərbaycanın ev sahibliyi ilə keçirilən COP29 həm təşkilatçılıq, həm iştirak, həm də əldə olunan nəticələrə görə tarixi tədbir oldu və iqlim dəyişikliyi ilə mübarizəyə önəmli töhfələri ilə yadda qalacaq. Lakin təəssüf ki, biz bunu Batı barədə deyə bilmərik”.
Vüqar İskəndərov deyib ki, hələ COP29 ərəfəsində bəşəriyyət Birləşmiş Ştatlarıın və Avropa Birliyinin, bir sözlə Batının məsuliyyətdən yayınmaq üçün məsələni siyasiləşdirmək, yeni maliyyə hədəfinin müəyyən edilməməsi üçün süni maneələr yaratmaq cəhdlərinin şahidi oldu. Xüsusilə COP29 ərəfəsində C.Bayden Administrasiyası və AB rəhbərliyi əlaqəli şəkildə müzakirələri hədəfdən yayındırmaq yolunu tutdular. Bu hal sonrakı proseslərdə də özünü göstərdi. Batı COP29-da əsas hədəflərdən diqqəti yayındıraraq öz qaranlıq məqsədlərini reallaşdırmağa çalışdı”.
Millət vəkili əlavə edib ki, bütün bu əsassız addımlar, qaranlıq məqsədlərə xidmət edən cəhdlər nəticəsiz qaldı: “COP29-u siyasiləşdirmək istəyən bəlli qüvvələr məğlub duruma düşdülər. Beynəlxalq ictimaiyyətin təzyiqləri qarşısında aparıcı Batı dövlətləri güzəştə getməli oldular. Digər tərəfdən inkişaf etməkdə olan ölkələr də kompromisə getdilər. Çəkinmədən demək olar ki, COP29-da 300 milyard dollar maliyyə hədəfi həqiqətən tarixi nailiyyətdir və qarşıdan gələn dövrdə bu məbləğin daha da artırılması üçün zəmin yaradıldı. Bu tarixi razılaşma isə məhz Bakıda əldə olundu. Bir sözlə, Azərbaycan bir daha tarix yazdı”.
