BAYRAQDAR MEDİA – COP29 iqlim konfransı çərçivəsində Heydər Əliyev Beynəlxalq Aeroportu və Avropa Beynəlxalq Hava Limanları Şurasının (ACI EUROPE) birgə təşkil etdiyi xüsusi tədbirdə qlobal hava limanı sənayesi dekarbonizasiya istiqamətində sürətlənmiş səylərini bir daha nümayiş etdirilib.
Bu haqda xəbər BAYRAQDAR MEDİA-ya sözügedən Aeroportun mətbuat xidmətindən daxil olub.
Xəbərdə bildirilir ki, “tədbirdə Aeroporta karbon emissiyalarının azaldılması üzrə əldə etdiyi irəliləyişlərə görə Hava Limanları Karbon Akreditasiyası (ACA) proqramının 2-ci səviyyə “Azaltma” sertifikatı təqdim olunub. “Biz ətraf mühitin mühafizəsini yalnız strateji məqsəd deyil, eyni zamanda, gələcək nəsillər qarşısında mühüm bir məsuliyyət kimi görürük. Bu nailiyyət bizi daha irəli addım atmağa, “Optimallaşdırma” səviyyəsinə çatmağa və davamlı inkişaf sahəsində daha müasir texnologiyaları və yenilikçi təşəbbüsləri tətbiq etməyə ruhlandırır. Bu uğur yalnız Heydər Əliyev Beynəlxalq Aeroportunun deyil, ümumilikdə Azərbaycanın davamlı inkişaf prinsiplərinə sadiqliyinin göstəricisidir. Aviasiyada ekoloji məsuliyyət artıq seçim deyil, müasir dövrün tələbidir,” – deyə “Azərbaycan Hava Yolları” QSC-nin prezidenti Samir Rzayev vurğulayıb”.
Daha sonra xəbərdə deyilir ki, “ACI EUROPE-un baş direktoru Olivye Yankovets çıxışında bildirib: “600-dən çox hava limanının akkreditasiyadan keçməsi hava limanı əməliyyatlarının tam dekarbonizasiyası istiqamətində əldə olunan növbəti mühüm nailiyyətdir. Bu, hava limanlarının dayanıqlılığı öz fəaliyyətlərinin əsas prioritetinə çevirdiyinin və hər il milyonlarla ton karbon emissiyasını əhəmiyyətli dərəcədə azaltdığının bariz nümunəsidir. Azərbaycanın paytaxt hava limanını iqlim fəaliyyət icmamıza qoşulması və alt-regionda öncül rol oynaması münasibətilə təbrik edirəm”. Tədbirdə ACI World-un baş icraçı direktoru Castin Erbaçi və Hava Nəqliyyatı üzrə Fəaliyyət Qrupunun (ATAG) baş icraçı direktoru Haldan Dodun iştirakı ilə “Aviasiyanın dekarbonizasiyası və Qlobal Çərçivə: Cari Vəziyyət və Perspektivlər” mövzusunda panel müzakirəsi keçirilib. Panel müzakirəsində sənaye liderləri davamlı inkişaf məqsədlərinə nail olmaq üçün əsas çağırışları və imkanları müzakirə edib, əməkdaşlığın və innovativ texnologiyaların tətbiqinin vacibliyini vurğulayıblar”.
Qeyd edək ki, Heydər Əliyev Beynəlxalq Aeroportu Azərbaycanın ekoloji məqsədlərinə dəstək olaraq karbon emissiyalarını azaltmaq və iqlim dəyişikliyinə qarşı mübarizə istiqamətində innovativ həllərin tətbiqini öz prioritet məqsədlərindən biri kimi müəyyən edib.
İlk şərhi yaza bilərsiniz