Naxçıvan Dövlət Milli Dram Teatrının töhfəsi

Son yeniləmə: 20 Noyabr 2024 11:12

BAYRAQDAR MEDİA – Bu günlərdə Bakı şəhərində keçirilən və dünyanın müxtəlif ölkələrindən nümayəndələrin iştirak etdiyi BMT-nin İqlim Dəyişmələri üzrə Çərçivə Konvensiyasının Tərəflər Konfransı (COP29) çərçivəsində müxtəlif tədbirlər olur, bir-birindən maraqlı layihələr reallaşdırılır.

Öz növbəsində C.Məmmədquluzadə adına Naxçıvan Dövlət Milli Dram Teatrı və Naxçıvan Dövlət Energetika Xidməti də öz töhfəsini verib. Teatrın təqdim etdiyi yeni tamaşa, mövzusunun aktuallığı ilə diqqət çəkib.

Bu barədə BAYRAQDAR MEDİA-ya Teatrdan məlumat verilib.

Bildirilib ki, “Naxçıvan Muxtar Respublikası Dövlət Energetika Xidməti və Naxçıvan Dövlət Milli Dram Teatrının birgə layihəsi olaraq hazırlanan səhnə əsəri tamaşaçılar tərəfindən maraqla izlənilib. Tamaşanın əsas leytmotivini yaşıl enerjiyə keçid, təbiətin mühafizəsi və ekoloji təmizliyə çağırış təşkil edir. Məqsəd, yaşıl enerji mənbələrinin genişləndirilməsi, ətraf mühitin qorunması və karbon qazı emissiyalarının azaldılmasına diqqət çəkmək, həmçinin Azərbaycanın iqlim təşəbbüslərində təbliğatını gücləndirməkdir”.

Məlumata görə, yazıçı Eluca Atalının “Odunçunun nağılı” folklor nümunəsindən ilhamlanaraq qələmə aldığı eyniadlı səhnə əsərində, qalaktikada yaşıl ada olan planetimizdə ekologiyanın qorunması, günəş işığının, suyun və küləyin önəmi vurğulanır: “Bu amil, rejissorun yaratdığı incə ştrixlər və mühüm detallarla səhnədə öz əksini tapıb. Əsərdə hadisələr xala obrazının Atanura nağıl danışması ilə başlayır. Xala nağıl danışdıqca, tamaşaçılar sehrli bir aləmə daxil olurlar. Bu aləmdə ağaclar rəqs edir və təbiət sanki dil açaraq danışır. Təbiətə ziyan vurmağa çalışan odunçunun məqsədi, meşədə ağacları doğrayıb, onları bazarda satmaqdır. Lakin Xala və Atanur ona mane olaraq, hər ağacın nə qədər faydalı olduğunu izah edir və onu məqsədindən çəkindirirlər”.

Qeyd edək ki, tamaşada həmçinin “Yaşıl enerji”yə keçiddən, “Yaşıl enerji”nin faydalarından bəhs edilib.
Onu da bildirək ki, teatrın kollektivi Bakıya səfər edərək COP29 məkanında tamaşanı ziyarətçilərə nümayiş etdirib.