BAYRAQDAR MEDİA – Azərbaycan Milli Elmlər Akademiyasının (AMEA) Mərkəzi Elmi Kitabxanası (MEK) qardaş Qazaxıstanın Aktöbe şəhərinin Mərkəzi Vilayət Kitabxanasında yeni yaradılan “Azərbaycan ədəbiyyatı guşəsi”nə dəstək məqsədi ilə mübadilə fondundan 150-dən artıq dəyərli nəşr hədiyyə edib.
Bu haqda xəbər BAYRAQDAR MEDİA-ya MEK-dən daxil olub.
Xəbərdə bildirilir ki, “Mərkəzi Vilayət Kitabxanasının oxucularının faydalanacağı, milli-mədəni irsin qardaş ölkədə tanıdılması, təbliği istiqamətində mühüm əhəmiyyətə malik nəşrlər sırasında Azərbaycanın dövlətçilik tarixini, mədəniyyətini, ədəbiyyatını, eləcə də görkəmli tarixi şəxsiyyətlərinin həyat və yaradıcılığını əks etdirən məlumatlar yer alıb. Qeyd edək ki, Azərbaycanın Qazaxıstanın Aktau şəhərindəki baş konsulluğu atılan addımı yüksək dəyərləndirərək hər iki ölkə arasındakı yüksək səviyyəli münasibətlərin, əlaqələrin dərinləşməsinə dəstək məqsədi ilə görülən bu kimi işlərin mühüm əhəmiyyətini vurğulayaraq təşəkkürünü bildirib”.
