Son yeniləmə: 4 Noyabr 2024 14:51
BAYRAQDAR MEDİA – Müasir İnkişaf İctimai Birliyinin sədri, siyasi şərhçi Mübariz Göyüşlünün baş redaktorluğu ilə noyabrın 1-dən “Cross Media” Analitik İnformasiya Portalı fəaliyyətə başlayıb.
Saytın yaradılma məqsədi və fəaliyyət göstərəcəyi istiqamətlər haqqında M.Göyüşlü BAYRAQDAR MEDİA-ya məlumat verib: “2020-ci ilin II Qarabağ müharibəsi, 2023-cü ilin anti-terror əməliyyatından sonra Azərbaycan dövlətinin, xalqının qarşısında çox geniş üfüqlər, imkanlar açıldı. Azərbaycan regional və qlobal miqyasda daha geniş siyasət yürütməyə başladı. Biz Azərbaycan Prezidentinin bu istiqamətdə fəaliyyətini müşahidə edirik. Onun çıxışları, qəbul etdiyi qərarlar, atdığı addımlar – hamısı Azərbaycan dövlətinin daha geniş, qlobal miqyasda bir siyasət yürütməsinin göstəricisidir. Cənab Prezidentin bu fəaliyyətlərinin ciddi təhlili, analitik araşdırmaları çox önəmlidir. Çünki onun çıxışlarında çox vacib məqamlar əks olunub. Biz də bir analitik informasiya portalı olaraq əsasən dövlət başçısının fikirlərinin, o cümlədən Azərbaycan dövlətinin ideoloji, siyasi, geoiqtisadi istiqamətdə çalışmalarının analitik təhlilini gerçəkləşdirməyi, həm də informasiya ilə təminatı daha da genişləndirməyi nəzərdə tutaraq belə bir sayt yaratdıq. Bildirim ki, biz jurnalistlərlərimizlə yanaşı, strateji düşüncələr, planlar, təhlillər, təqdimatlar verə biləcək ölkəmizin çox aparıcı analitiklərinin də birləşdiyi bir komanda olaraq yola çıxmışıq. Noyabrın 1-dən etibarən Media Reyestrinə də qeydiyyata düşərək fəaliyyətə başlamağımızı elan etdik. Düşünürəm ki, qarşıya qoyduğumuz hədəflərə nail ola biləcəyik. Ötən günlərdə də bir neçə sanballı araşdırmanı – təhlil, şərh və təqdimatı ortaya qoya bilmişik. Ümid edirik ki, daha ciddi nəticələrlə Azərbaycan Prezidentinin yürütdüyü siyasəti, hədəfləri daxili və xarici auditoriyaya çatdıra bilmək məqsədimizi yerinə yetirə biləcəyik”.
İlk şərhi yaza bilərsiniz