Son yeniləmə: 30 Oktyabr 2024 09:24
BAYRAQDAR MEDİA – 02-11 oktyabr tarixlərində Azərbaycan Gənclər Fondunun “İdeyanı Reallaşdır 2023” fərdi qrant müsabiqəsinin qalibi olmuş “Şimal Kuboku” intellektual yarışı layihəsi keçirilib.
Bu barədə BAYRAQDAR MEDİA-ya layihə rəhbəri Yusif Məmmədəli məlumat verib.
O, qeyd edib ki, layihə Xaçmaz, Quba, Qusar və Siyəzən rayonlarının, əsasən də bu rayonların kənd məktəblərindəki 9-11 ci sinif şagirdlərini “Şimal Kuboku” uğrunda öz intellektlərini sərgiləmələri üçün intellektual səciyyəli yarışlara təşviq edir: “Bəlli olduğu kimi əsası Ulu öndər Heydər Əliyev tərəfindən qoyulan və Prezident İlham Əliyev tərəfindən davam etdirilən gənclər siyasəti Azərbaycan gənclərinin bütün sahələrədə inkişafına təkan verib. Təbii ki, bu siyasətin yerlərdə uğurla reallaşması üçün bizlərin də üzərinə müəyyən vəzifələr düşür. Elə rəhbərlik etdiyim layihənin reallaşmasında da əsas məqsəd budur. Yəni layihədə məqsəd ölkəmizdə uğurla həyata keçirilən gənclər siyasətinə dəstək olmaq, bu sahədə atılan addımları yerlərdə təbliğ etmək və kəndlərdə gənclərin, məktəblilərin intellektual inkişafı, bilik və bacarıqlarının artırılması üçün bu cür bilik yarışları təşkil etməkdir”.
Vurğulanıb ki, layihə çərçivəsində keçirilən bilik yarışlarında qalib gələnlərə mükafatlar, digər iştirakçılara isə sertifikatlar təqdim edilib.
İlk şərhi yaza bilərsiniz