Son yeniləmə: 24 Oktyabr 2024 14:01
BAYRAQDAR MEDİA – “Səyyar ASAN xidmət avtobusu oktyabr ayının 16-dan İsmayıllı şəhəri Heydər Əliyev prospekti 55 ünvanında vətəndaşlara xidmət göstərir”.
Bu barədə “ASAN xidmət”dən məlumat verilib.
Bildirilib ki, “İsmayıllı rayonunda 17 dəfə səyyar avtobus vasitəsilə xidmət gerçəkləşib. Bu dövr ərzində 61463 vətəndaş müraciəti daxil olub. Səyyar şəkildə göstərilən xidmətlər Azərbaycan Respublikasının Ədliyyə Nazirliyi, Daxili İşlər Nazirliyi, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu, İqtisadiyyat Nazirliyi yanında Əmlak Məsələləri Dövlət Xidməti tərəfindən təqdim olunur”.
Məlumata görə, hazırda İsmayıllı rayonunda fəaliyyət göstərən Səyyar ASAN avtobusunun növbəti dayanacağı Ağdaş rayonu olacaq: “2013-cü ildən həyata keçirilən Səyyar ASAN xidmət vasitəsilə ümumilikdə 3 milyondan çox, 2024-cü il ərzində isə 136.931 vətəndaş müraciəti daxil olub. Xatırladaq ki, “ASAN xidmət” mərkəzlərinin olmadığı regionlardakı əhaliyə xidmətlərin çatdırılması və onların mərkəzlərə gəlmədən xidmətlərdən yararlanması üçün xüsusi təchiz edilən 10 xüsusi avtobus vasitəsilə səyyar formada əhaliyə xidmət göstərilir. Əsas məqsəd dövlət xidmətlərinin vətəndaşlara daha rahat, yeni və innovativ üsullarla təqdim edilməsi, vətəndaşlar üçün əlçatanlığın təmin edilməsi və vətəndaş məmnunluğuna nail olunmasıdır”.
