Son yeniləmə: 24 Oktyabr 2024 09:13
Bakıda Qazaxıstan Respublikasının Müstəqillik Günü qeyd edilib
BAYRAQDAR MEDİA – Oktyabrın 23-də Bakıda Qazaxıstan Respublikasının Müstəqillik Günü qeyd edilib.
Mərasim hər iki ölkənin Dövlət himnlərinin səsləndirilməsi ilə başlayıb.
Sonra açılış nitqi ilə çıxış edən Qazaxıstanın Azərbaycandakı səfiri Alim Bayel, ölkəsinin müstəqillik əldə etdiyi illər ərzində keçdiyi yoldan danışıb.
Azərbaycan-Qazaxıstan münasibətlərinə toxunana diplomat bildirib ki, ötən il ərzində dövlət başçıları səviyyəsində üç dəfə qarşılıqlı səfərlər gerçəkləşdirilib: “Eyni zamanda bildirmək istəyirəm ki, Orta Dəhliz üzrə ixracımız davam edir. Bu il ərzində Qazaxıstanla Azərbaycan arasında qarşılıqlı ticarət dövriyyəsinin həcmi 3 milyard dollara çatıb. Eyni zamanda Qazaxıstan, Özbəkistan və Azərbaycan “yaşıl enerjinin” ixracı üzrə də razılıq əldə edib. Bizim ölkəmiz Bakıda keçiriləcək BMT-nin İqlim Dəyişmələri üzrə Çərçivə Sazişinin Tərəflər Konfrasının 29-cu Sessiyasında (COP29) iştirak edəcək”.
Səfir, həmçinin “Bu il biz Türkdilli Dövlətlərin Təşkilatının yaradılmasının 15 illiyini qeyd edirik. Çox şadam ki, ölkələrimiz əhali üçün daha xoşbəxt gələcəyin təminatı sahəsində də birlikdə fəaliyyət göstərir” deyə qeyd edib.
Alim Bayel strateji tərəfdaşlıq – müttəfiqlik səviyyəsinə yüksələn Qazaxıstan-Azərbaycan münasibətlərinin daha da inkişaf etməsi üçün səylərini əsirgəməyəcəklərin bəyan edib.
Sonra xarici işlər nazirinin müavini Elnur Məmmədov Azərbaycan Hökuməti adından çıxış edərək deyib ki, müstəqillik illərində ölkələrimiz əhəmiyyətli uğurlara nail olaraq, öz regionunda mühüm dövlətlərə çevriliblər.
Azərbaycan ilə Qazaxıstan arasında bağlanan müqavilələr və bəyannamələr haqqında danışan nazir müavini qeyd edib ki, keçən il aprelin 23-də Ali Dövlətlərarası Şuranın yaradılması ilə bu əlaqələr yeni inkişaf mərhələsinə qədəm qoyub.
E.Məmmədov bildirib ki, il ərzində Qazaxıstanla Azərbaycan arasında qarşılıqlı ticarət dövriyyəsinin həcmi 3 milyard dollara çatıb.
Daha sonra Qazaxıstan milli musiqisinə həsr olunan bədii hissə qonaqlara nümayiş etdirilib.
Sonda Qazaxıstanla əməkdaşlıqda xüsusi rolu olan şəxslər təltif olunublar.
