Son yeniləmə: 16 Oktyabr 2024 12:54
BAYRAQDAR MEDİA – Məktəbəqədər təhsil müəssisələrində pedaqoji fəaliyyətlə məşğul olan tərbiyəçi-müəllim və metodistlərin peşəkarlıq səviyyəsinin və peşə yararlılığının yoxlanılması məqsədilə keçiriləcək diaqnostik qiymətləndirilməyə dair maarifləndirici görüşlər təşkil olunub.
Bu barədə BAYRAQDAR MEDİA-ya oktyabrın 16-da Bakı Şəhəri üzrə Təhsil İdarəsindən məlumat verilib.
Bildirilib ki, “görüşlərdə paytaxtın Səbail, Yasamal, Nəsimi, Nərimanov, Binəqədi, Nizami və Qaradağ rayonları üzrə məktəbəqədər təhsil müəssisələrinin tərbiyəçi-müəllim və metodistləri iştirak ediblər. Bakı Şəhəri üzrə Təhsil İdarəsinin müdir müavini Anar Məmmədov və İdarənin müvafiq struktur bölmə rəhbərləri diaqnostik qiymətləndirmənin mərhələləri, məzmunu haqqında məlumat verib, iştirakçıları maraqlandıran sualları cavablandırıblar”.
Məlumatda qeyd edilib ki, 19-20 oktyabr tarixlərində ilk dəfə olaraq keçiriləcək məktəbəqədər təhsil müəssisələrində pedaqoji fəaliyyətlə məşğul olan tərbiyəçi-müəllim və metodistlərin diaqnostik qiymətləndirilməsinin test mərhələsi paytaxt üzrə 8 imtahan mərkəzində təşkil olunacaq: “Prosesə 5578 tərbiyəçi-müəllim və metodistin cəlb olunması nəzərdə tutulur”.
İlk şərhi yaza bilərsiniz