BAYRAQDAR MEDİA – Türk Mədəniyyəti və İrsi Fondu tərəfindən həyata keçirilən “Füzuli Günləri” çərçivəsində Bakı və Gəncə şəhərlərində Müslüm Maqomayev adına Azərbaycan Dövlət Akademik Filarmoniyasının Azərbaycan Dövlət Xorunun və Qaziza Jubanova adına Aktöbə Vilayət Filarmoniyasının Qazax Kamera Xorunun birgə konsertləri təşkil olunub.
Bu haqda xəbər BAYRAQDAR MEDİA-ya sözügedən Fonddan daxil olub.
Xəbərdə bildirilir ki, “Bakıda M.Maqomayev adına Azərbaycan Dövlət Akademik Filarmoniyasında və Gəncədə Fikrət Əmirov adına Gəncə Dövlət Filarmoniyasında gerçəkləşdirilən konsertlər Fond tərəfindən Türk mədəniyyətinin inkişafında müstəsna yer tutan görkəmli şair, mütəfəkkir, böyük ustad Məhəmməd Füzulinin 530 illik yubileyinə həsr olunub. Sözügedən tədbirlər Prezident İlham Əliyevin böyük ustad M.Füzulinin 530 illik yubileyinin qeyd olunması ilə bağlı 25 yanvar 2024-cü il tarixli Sərəncamına əsasən Fondun başlatdığı genişmiqyaslı “Füzuli günləri” adlı layihə çərçivəsində təşkil olunub. Fond “Füzuli günləri” layihəsi M.Füzulinin yaradıcılığının dünyada geniş şəkildə işıqlandırılmasına və təbliğinə, eləcə də qardaş türk ölkələri arasında əlaqələrin möhkəmlənməsinə töhfə vermək məqsədi daşıyır. Füzuli yaradıcılığına həsr olunmuş gecələrdə Türk Dünyası musiqi tarixinin ən böyük əsəri olan bəstəkar Cahangir Cahangirovun “Füzuli” kantatası, eləcə də qazax bəstəkarlarının nadir əsərləri ifa olunub”.
Daha sonra xəbərdə, “Fond prezidenti Aktotı Raimkulova Fondun fəaliyyətindən bəhs edərək layihə ilə bağlı ətraflı məlumat verib. Fondun Prezident İ.Əliyevin təşəbbüsü və Qazaxıstan, Qırğızıstan, Türkiyə dövlət başçılarının dəstəyi ilə yaradıldığını vurğulayan A.Raimkulova, təşkilatın əsas missiyasının Türk dünyasının zəngin mədəni irsinin qorunması, araşdırılması və beynəlxalq aləmdə təbliği olduğunu qeyd edib. O, xüsusilə fondun Türk dünyasının dahi şəxsiyyətlərinin irsinin gələcək nəsillərə çatdırılması yönündə “Türk Dünyasının görkəmli şəxsiyyətləri”, “Türk Dünyasının ədəbi inciləri”, “Türk Dünyasının elmi inciləri” adlı kitab seriyalarını tərtib etdiyini diqqətə çatdırıb. A.Raimkulova nitqində Prezidentin 25 yanvar 2024-cü il tarixində M.Füzulinin 530 illiyinin qeyd olunması ilə bağlı imzaladığı Sərəncamın əhəmiyyətini xüsusi vurğulayıb. O, fondun bu təşəbbüsə dəstək məqsədi ilə bir sıra layihələr həyata keçirdiyini və bunlardan biri olan “Heydər Əliyev və Məhəmməd Füzuli” kitabının nəşr edildiyini bildirdi. Bu kitabda Azərbaycanın ümummilli lideri H.Əliyevin Füzuli irsinin tanıdılması istiqamətində müstəsna xidmətləri əks olunub” deyə qeyd edilir.
Xəbərdə həmçinin deyilir ki, “A.Raimkulova qeyd edib ki, 23-26 sentyabrda Qazaxıstanda keçirilən Azərbaycan Mədəniyyəti Günləri “Füzuli–530 misra” kitabının təqdimatı ilə açılıb. Fondun növbəti böyük layihəsi isə Bakıda və Gəncədə təşkil ediləcək “Füzuli günləri”dir. O, Qazaxıstanın Aktöbə vilayətinin İcra Hakimiyyətinin dəstəyi ilə keçirilən konsertlərin həm də Jubanova adına Aktöbə Filarmoniyasının 80 illik yubileyinin qeyd olunmasına həsr olunduğunu qeyd edərək, Filarmoniyanın direktoru Dina Niyazovanı təbrik edib”.
Tədbirlərdə Azərbaycanda akkreditə olunan diplomatik korpusun nümayəndələri, millətvəkilləri, tanınmış mədəniyyət, incəsənət, ədəbiyyat xadimləri, ictimaiyyət və KİV nümayəndələri iştirak ediblər.
Konsertlər Bakı və Gəncə izləyiciləri tərəfindən böyük maraq və alqışlarla qarşılanıb.
