Son yeniləmə: 14 Oktyabr 2024 07:57
Bu sahədə təbii sərvətlər mühüm rol oynayır
BAYRAQDAR MEDİA – “Türkiyə, zəngin təbii sərvətləri və qabaqcıl sağlamlıq xidmətləri sayəsində dünya miqyasında sağlamlıq turizmi sahəsində önəmli bir mərkəzə çevrilib. Ölkənin müxtəlif bölgələrində mövcud olan termal sular, mineral bulaqlar, müalicəvi palçıq və təmiz hava, sağlamlıq turizminin əsas resursları sırasındadır”.
Türkiye Turizm Tanıtım ve Geliştirme Ajansından (TGA) BAYRAQDAR MEDİA-ya verilən məlumatda belə deylir.
Məlumata görə, bu resurslar müxtəlif xəstəliklərin müalicəsində istifadə olunur və hər il dünyanın dörd bir yanından turistlərin diqqətini çəkir: “Türkiyə, sağlamlıq turizmi sahəsindəki təbii sərvətləri ilə dünya səviyyəsində tanınır. Termal sular, müalicəvi mərkəzlər, spa xidmətləri və şifalı bitkilər, ziyarətçilərə unikal bir təcrübə təqdim edir. Turizmin bu növünün inkişafı, Türkiyənin turizm infrastrukturunun güclü olması ilə də əlaqəlidir. Otellər, müalicə mərkəzləri, restoranlar və digər xidmətlər, turistlərin rahatlığı üçün nəzərdə tutulub. Ayrıca, Türkiyənin müxtəlif bölgələri, mədəniyyət, tarix və təbiət baxımından zəngin olması ilə turistlərin marağını cəlb edir. Bu səbəbdən, Türkiyə, sağlamlıq turizmi üçün ideal bir destinasiya olaraq seçilir”.
Məlumatda deyilir ki, Türkiyənin sağlamlıq turizminin əsas bölgələri və onların təbii sərvətləri aşağıdakılardır:
Afyonkarahisar – termal sular və bulaqlar
TGA-nın məlumatına əsasən, Afyonkarahisar, Türkiyənin termal sağlamlıq turizminin paytaxtı kimi tanınır: “Burada yerləşən Qazlıgöl, Ömər və Sandıklı termal bulaqları, oynaq xəstəlikləri, dəri xəstəlikləri və revmatizm kimi problemlərin müalicəsində effektivdir. Bu bölgə, termal suların müalicəvi xüsusiyyətləri ilə şəfa axtaranların ən çox üstünlük verdiyi yerlərdəndir”.
Pamukkale bir möcüzədir
Məlumatda deyilir ki, UNESCO-nun Dünya İrs Siyahısına daxil edilən Pamukkale, ağ travertin terrasları və müalicəvi termal suları ilə dünyada məşhurdur.
Denizlidə yerləşən, həmçinin sədəf, ekzema kimi dəri xəstəlikləri və əzələ-sümük sistemi problemlərinin müalicəsi üçün Pamukkale termal suları müalicəvi təsirə malikdir.
Yalova – termal və şəfalı sular
Qeyd edilir ki, İstanbula yaxınlığı ilə diqqət çəkən Yalova, həm təbii gözəllikləri, həm də termal suları ilə tanınır.
Belə ki, revmatizm, ortopedik problemlər və stressin müalicəsində istifadə edilən Yalova Kaplıcaları, təbiətdə şəfa axtaranlar üçün ideal məkandır.
Kütahya isə Yoncalı və Ilıca termal bulaqları ilə tanınır
Başqa bir diyar, Kütahya, termal sağlamlıq turizmi sahəsində böyük potensiala sahibdir.
Məlumata görə, Yoncalı termal suları, fiziki terapiya və reabilitasiya sahələrində istifadə olunur. Bundan başqa, Ilıca Termal Bulaqları həzm sistemi xəstəliklərinə qarşı müalicəvi təsirə malikdir.
Bursa tarixi termal bulaqları ilə sağlamlıq turizmində önəmli yer tutur
Məlumata əsasən, Bursa şəhəri, tarixi termal bulaqları ilə sağlamlıq turizmində önəmli yer tutur: “Osmanlı dövründən bu yana istifadə edilən Çekirge Kaplıcaları, revmatizm və dəri xəstəliklərinin müalicəsində faydalıdır. Bursa həmçinin təmiz havası və termal otelləri ilə də sağlamlıq məqsədilə səyahət edən turistlərin diqqətini cəlb edir”.
Balıkesir Kaz Dağları və termal suları ilə fərqlənir
Başqa bir diyar Balıkesirdir. TGA-nın məlumatında qeyd edilir ki, Kaz Dağlarının ətəyində yerləşən Edremit, oksigenlə zəngin havası və müalicəvi termal suları ilə tənəffüs sistemi xəstəlikləri üçün ideal bir məkandır.
Güre termal suları isə xüsusilə dəri və əzələ-sümük sistemi xəstəliklərinin müalicəsində effektivdir.
İzmirə gedənlər Balçova termal təsislərinə baş çəksinlər
BAYRAQDAR MEDİA-ya verilən məlumatda o da bildirilir ki, İzmirin Balçova bölgəsində yerləşən termal bulaqlar, Roma dövründən bəri istifadə olunan təbii müalicəvi mənbələrdir: “Termal sular revmatizm, oynaq xəstəlikləri və dəri problemləri üçün şəfalıdır və şəhərdəki termal otellər bu təbii sərvətləri müasir xidmətlərlə birləşdirir”.
