Cavid Aydın: Bələdiyyə başqanı Ayşe Ünlüce dərnəyimizin fəaliyyəti ilə bağlı məlumatı və təkilflərimizi çox xoş qarşıladı
BAYRAQDAR MEDİA – “Eskişehir Azərbaycanlılar Dərnəyinin fəaliyyətində üstünlük verdiyi məqamlardan biri də yerli rəhbərliklə sıx təmasların qurulmasıdır. Bu baxımdan son seçkilərdə Eskişehir Bələdiyyə başqanı seçilən Ayşe Ünlüce ilə görüşümüz reallaşdı”.
Bunu BAYRAQDAR MEDİA-ya özəl açıqlamasında Eskişehir Azərbaycanlılar Dərnəyinin sədri Cavid Aydın deyib.
O, qeyd edib ki, Ayşe Ünlüceni başqan seçilməsi münasibətilə təbrik ziyarəti çoxdan planlaşdırılmışdı: “Sadəcə anamın rəhmətə getməsi ilə əlaqədar olaraq biz məcburi qaydada planlarımızda bəzi dəyişiklik etdik. Bu günlərdə isə nəhayət ki, bu görüş reallaşdı”.
Görüş bir tərəfdən Ayşe Ünlüceni təbrik xarakteri daşısa da, həm də EsAzDer-in fəaliyyəti haqqında yeni başqana ətraflı məlumat vermək olub: “Bu görüşün əsas səbəblərindən biri də bu idi ki, biz Eskişehirdə Azərbaycan Mədəniyyət Evinin yaradılması üçün yerin müəyyən olunmasına dəstək xarakteri daşıyırdı. Dəstək deyəndə, biz heç də Bələdiyyədən təmannasız hansısa yeri istəmirik. Biz həmin yeri kirayə yolu ilə tutacayıq. Sadəcə istəyirik ki, Azərbaycan Mədəniyyət Evi şəhərdəki tarixi yerlərdən birində kirayələnsin. Həmin yerin müəyyən edilməsində də Bələdiyyə bizə müvafiq dəstək verə bilər”.
C.Aydın bildirib ki, “bələdiyyə başqanı Ayşe Ünlüce dərnəyin fəaliyyəti ilə bağlı məlumatı və təkilflərimizi çox xoş qarşıladı. Ayşe xanım maraqlı bir təkliflə də çıxış etdi. Bildirdi ki, Eskişehirlə Azərbaycanın bir şəhərini qardaş şəhər edərək, iki ölkə arasındakı bağların daha da güclənməsi istiqamətində mühüm addımlar atmaq olar”.
