Son yeniləmə: 9 Oktyabr 2024 13:20
BAYRAQDAR MEDİA – Son illərdə ölkədə su ehtiyatlarından səmərəli istifadənin və su təsərrüfatı obyektlərinin idarə olunmasının təkmilləşdirilməsi istiqamətində mühüm addımlar atılır.
Azərbaycan Dövlət Su Ehtiyatları Agentliyindən BAYRAQDAR MEDİA-ya verilən məlumata görə, həmçinin müasir tələblərə cavab verən meliorasiya və su təsərrüfatı obyektlərinin qurulması, eləcə də bu sahədə uçot və nəzarətin təkmilləşdirilməsi istiqamətində ardıcıl tədbirlər görülür: “Bununla yanaşı, son dövrlərdə müşahidə edilən qlobal iqlim dəyişikliyi, dünyada orta temperaturun yüksəlməsi, əsasən qonşu ölkələrdən daxil olan yerüstü su ehtiyatının azalması, digər tərəfdən suya tələbatın artması məhdud su ehtiyatlarına malik olan ölkəmizdə su ehtiyatlarının artırılması və sudan səmərəli istifadə üçün təxirəsalınmaz tədbirlər görülməsini zəruri edib”.
Məlumata əsasən, bu məqsədlə Prezident İlham Əliyevin tapşırığına əsasən ölkəmizdə su ehtiyatlarından səmərəli istifadənin təmin edilməsi ilə bağlı Dövlət Su Komissiyası yaradılıb: “Baş nazirin müavini Şahin Mustafayevin rəhbərlik etdiyi Dövlət Su Komissiyası tərəfindən ölkə ərazisində təsdiq olunan tədbirlər planına uyğun bir sıra işlər uğurla həyata keçirilir və davam etməkdədir. Tədbirlər planına uyğun olaraq həyata keçirilən layihələrdən biri də “Boztəpə kanalının yenidən qurulması”nın I mərhələsidir. Azərbaycan Dövlət Su Ehtiyatları Agentliyi tərəfindən 2022-ci ildə bərpasına başlanılan Boztəpə kanalının yenidən qurulmasının I mərhələsi artıq başa çatıb”.
Məlumatda deyilir ki, kanalın su buraxma qabiliyyəti 8,6 kub m/san, uzunluğu isə 42,4 kilometrdir: “Suvarma kanalı üzərində sudüşürən, suburaxan, supaylayıcı, borulu keçid və səviyyəqaldıran olmaqla ümumilikdə 186 hidrotexniki qurğu var. Mənbəyini Araz çayından götürən suvarma kanalının yenidən qurulması İmişli rayonunda 8 min 884 hektar və Beyləqan rayonunda 891 hektar olmaqla, ümumilikdə 9 min 775 hektar torpaq sahəsinin suvarma suyu ilə təminatını yaxşılaşdırıb. Hazırda 42,4 kilometr uzunluğu olan Boztəpə kanalında tikinti işləri başa çatıb, SCADA sistemlərinin inteqrasiyası üçün isə işlər davam edir”.
