BDU-nun Astrofizika kafedrası: “Oktyabrın 2-dən noyabrın 7-dək Orionid meteor yağışı müşahidə ediləcək”
BAYRAQDAR MEDİA – Oktyabrın 2-dən noyabrın 7-dək Orionid meteor yağışı müşahidə ediləcək. Oktyabrın 21-də meteorların sayı pik həddə olacaq.
Bu haqda xəbər BAYRAQDAR MEDİA-ya Bakı Dövlət Universitetinin (BDU) Fizika fakültəsinin Astrofizika kafedrasından daxil olub.
Xəbərdə bildirilir ki, “Orion bürcündə olduğuna görə bu meteor yağışı Orionidlər adlanır. Onun zirvəsində saatda 20-yə qədər meteor görünə bilər. Bakıdan yağış saat 22:00-dan 06:27-yə – səhər açılana qədər müşahidə olunacaq.
Bu, ayın ikinci meteor yağışıdır. Drakonid meteor yağışı oktyabrın 6-10-da müşahidə ediləcək və oktyabrın 8-də pik həddinə çatacaq. Orionid meteor yağışı Halley kometinin yaratdığı ikinci meteor yağışıdır. Halley kometinin Günəş ətrafında bir dövrünün tamamlanması təxminən 76 il çəkir. O, Yerdən növbəti dəfə 2061-ci ildə görünəcək”.
Daha sonra xəbərdə, “bəzən meteorlar meteor yağışı kimi tanınan qruplar halında düşürlər. Meteor yağışını təşkil edən meteorlar paralel trayektoriyalarla və eyni sürətlə hərəkət etdiyi üçün Yerdəki müşahidəçilərə səmanın eyni nöqtəsindən uçurlar kimi görünür. Bu nöqtəyə radiant deyilir. Ənənəyə görə, meteor yağışları radiantın yerləşdiyi bürcün adını daşıyır” deyə qeyd edilir.
