Qərbi Azərbaycan İcması: Bu, haqqın və ədalətin nadir təntənəsidir

Son yeniləmə: 19 Sentyabr 2024 10:59

BAYRAQDAR MEDİA – “Bu gün Azərbaycan Respublikasının Qarabağ bölgəsində həyata keçirilmiş anti-terror tədbirlərindən bir il ötür. Bu tədbirlə Azərbaycan otuz ildən artıq davam edən haqsızlığa son qoymuş və ölkənin suverenliyini tam bərpa etmişdir. Bu qətiyyətli addım Ermənistanın Azərbaycanın ərazi bütövlüyü və suverenliyinə qarşı uzunmüddətli qəsdini sona çatdıraraq beynəlxalq hüququn aliliyini təmin etmişdir”.

Bu fikirlər Qərbi Azərbaycan İcmasının bəyanatında öz əksini tapıb.

BAYRAQDAR MEDİA-ya verilən məlumata görə, bəyanatda daha sonra deyilir: “Beləliklə, Ümummilli Lider Heydər Əliyevin 1993-cü ildə hakimiyyətə qayıdışı ilə başlanmış sistemli mübarizə, Müzəffər Ali Baş Komandan, Prezident İlham Əliyevin rəhbərliyi altında uğurla tamamlanmışdır. Otuz il davam edən və tam qələbə ilə nəticələnən bu mübarizə, Azərbaycanda xalq və dövlət arasında birliyin təcəssümüdür. Azərbaycanın atdığı addımlar təkcə özünün milli maraqlarına xidmət etməmiş, həm də beynəlxalq ədalət prinsiplərini müdafiə etmişdir. Bu, dünyanın xaos və ədalətsizliklərlə dolu olduğu bir dövrdə haqqın və ədalətin nadir təntənəsidir”.

Bəyanatda, həmçinin “Təəssüf ki, bəzi xarici qüvvələr bu nailiyyətləri mənfi işıqda göstərməyə və ikiüzlülük yolu ilə yenidən gərginlik yaratmağa cəhd edirlər. Biz bu qüvvələrdən beynəlxalq hüquq normalarına hörmət etməyi və regionda davamlı sülhə mane olmamağı tələb edirik. Biz bütün dövlətləri ədalətin bu şanlı qələbəsini alqışlamağa və tarixin bu ağrılı səhifəsinin ləyaqətlə bağlanması üçün Ermənistandan qovulmuş azərbaycanlıların öz evlərinə qayıdışını dəstəkləməyə çağırırıq” deyə qeyd edilib.