Son yeniləmə: 18 Sentyabr 2024 11:36
BAYRAQDAR MEDİA – Azərbaycan Dövlət Akademik Milli Dram Teatrında (ADAMDT) iki yeni tamaşa hazırlanacaq.
Bu haqda xəbər BAYRAQDAR MEDİA-ya sözügedən Teatrın mətbuat xidmətindən daxil olub.
Xəbərdə bildirilir ki, “yaradıcılıq işlərinə başlanılan yeni səhnə əsərləri xalq yazıçıları Elçinin “Baş” və Kamal Abdullanın “Sehrbazlar dərəsi” romanları əsasında hazırlanacaq eyniadlı tamaşalardır. “Baş” Əməkdar incəsənət xadimi, Dövlət mükafatı laureatı Mehriban Ələkbərzadənin səhnələşdirməsi və quruluşçu rejissorluğu ilə ərsəyə gələcək. Səhnə əsərinin quruluşçu rəssamı Əməkdar mədəniyyət işçisi İlham Elxanoğlu, geyim üzrə rəssamı Vüsal Rəhimov, bəstəkarı Azər Hacıəsgərli, rejissor assistentləri Ceyran Başaran və Nərmin Həsənovadır”.
Sonra xəbərdə, ““Sehrbazlar dərəsi”nin quruluşçu rejissoru Əməkdar incəsənət xadimi Bəhram Osmanov, rəssamı Gennadi Skaramoxov, bəstəkarı Xalq artisti Siyavuş Kərimi, səhnə hərəkəti və plastika üzrə mütəxəssisi Bəhruz Əhmədli, işıq üzrə rəssamı Rafael Həsənov, rejissor assistenti Ceyran Başarandır. Tamaşada Xalq artistləri Əli Nur, Kazım Abdullayev, əməkdar artistlər Füzuli Hüseynov, Rövşən Kərimduxt, Mətanət Atakişiyeva, Kazım Həsənquliyev, aktyorlar Elnur Qədirov, İlahə Həsənova və Tural İbrahimov çıxış edəcək” deyə qeyd olunur.
