40-dək QHT nümayəndəsi bir arada

Son yeniləmə: 13 Sentyabr 2024 00:14

“Tullantılar haqqında Azərbaycan Respublikasının Qanunu”nun icra vəziyyətinə dair ictimai müzakirə keçirilib

BAYRAQDAR MEDİA – Sentyabrın 12-də Qeyri-Hökumət Təşkilatlarına Dövlət Dəstəyi Agentliyinin təşkilatçılığı ilə 1998-ci ildə qəbul edilmiş “Tullantılar haqqında Azərbaycan Respublikasının Qanunu”nun icra vəziyyətinə dair ictimai müzakirə keçirilib.

Bu barədə BAYRAQDAR MEDİA-ya Agentlikdən məlumat verilib.

Bildirilib ki, “müzakirədə QHT-lərə Dövlət Dəstəyi Agentliyinin icraçı direktoru Aygün Əliyeva, Ekologiya və Təbii Sərvətlər Nazirliyinin Hüquq və insan resursları şöbəsinin müdiri Aynurə Kərimova, Ekoloji siyasət şöbəsinin sektor müdiri Mehman Nəbiyev, İqtisadiyyat Nazirliyinin Dayanıqlı inkişaf və sosial siyasət şöbəsinin Dayanıqlı inkişaf məsələləri sektorunun müdiri Pərvin Xasıyeva, “Təmiz Şəhər” ASC-in Ekologiya şöbəsinin müdiri Səbuhi Babayev və 40-dək QHT nümayəndəsi iştirak edib”.

Məlumata görə, görüşdə “Tullantılar haqqında Azərbaycan Respublikasının Qanunu”na zəruri əlavə və dəyişikliklərin edilməsi, təkliflərin hazırlanması, həmçinin Qarabağ və Şərqi Zəngəzurda vətəndaşlar tərəfindən həmin ərazilərə səfərlər zamanı təbiətin çirkləndirilməsi məsələsi ilə bağlı müzakirələr aparılıb, QHT-lərin fikirləri dinlənilib.

Qurum nümayəndələri müvafiq qeydlər götürüblər, suallar cavablandırılıb.