BAYRAQDAR MEDİA – Məlum olduğu kimi Qazaxıstanın paytaxtı Astana V Dünya Köçəri Oyunlarına ev sahibliyi edəcək.
Bu arada Kırım Haber Ajansı məlumat yayıb ki, Qazaxıstan Turizm və İdman Nazirliyinin rəsmisi Ercan Erkinbayev belə tədbirlərin ölkənin beynəlxalq aləmdə tanınmasını artıracağını və turizmə böyük töhfə verəcəyini vurğulayıb. Bundan əlavə, xarici mətbuatın marağı ilə turistlərin sayının xeyli artacağı gözlənilir.
Məlumata görə, əvvəlki Dünya Köçəri Oyunları böyük marağa səbəb olmuşdu: “2014-cü ildə Qırğızıstanda keçirilən ilk oyunlara 19 ölkədən 600 idmançı qatılaraq çoxsaylı turistlərin və beynəlxalq medianın diqqətini cəlb edib. 2016-cı ildə bu rəqəm 62 ölkəyə və 40 min turistə yüksəlib. 2018-ci ildə tədbiri 80 ölkədən 2000-dən çox iştirakçı və 150 mindən çox tamaşaçı izləyib”.
Qeyd edilib ki, bu il Qazaxıstana 89 ölkədən 2000-dən çox iştirakçının gələcəyi gözlənilir: “Bundan əlavə, 100 min turist hədəflənir. Erkinbayev oyunların əvvəlki illərdə böyük uğurla keçirildiyini və bu il də eyni uğura ümid etdiklərini bildirib. Tədbirin açılışına bir gün qalmış etnokəndin açılışı planlaşdırılır və iki gün ərzində məşhur sənətçi Dimaşın konsertləri keçiriləcək. Bu tədbirlər turistlərin diqqətini cəlb etməkdə də mühüm rol oynayacaq”.
