Press "Enter" to skip to content

BDU 2 komanda ilə “TEKNOFEST-2024”ün finalında

BDU komandası

BAYRAQDAR MEDİA – Bakı Dövlət Universiteti (BDU) “TEKNOFEST – Akdeniz 2024” Aerokosmik və Texnologiya Festivalının final mərhələsində 2 komanda (“BSU Creativity Workz” və “ESST-6”) ilə təmsil olunur.

Bu haqda xəbər BAYRAQDAR MEDİA-ya BDU-nun mətbuat xidmətindən daxil olub.

Xəbərdə deyilir ki, “festivalın “Aqrar texnologiyalar” kateqoriyasında finala çıxan “BSU Creativity Workz” komandasının “Irrigo” layihəsində əşyaların interneti (IoT) texnologiyasındakı innovativ sistem vasitəsi ilə əkin sahələri, tarlalar və istixanaların uzaqdan monitorinqinin təmin edilməsi nəzərdə tutulub. Mobil tətbiq vasitəsi ilə 20-dən çox parametrin, o cümlədən torpaq nəmliyi, UV miqdarı, temperatur, torpaqdakı duzlaşma, pH dəyəri, CO2 səviyyəsi və gübrə miqdarı kimi göstəricilərin canlı izlənməsi mümkün olacaq. Bundan əlavə, sahibkarlar bu parametrləri uzaqdan idarə etməklə, aqrar sahədə insan əməyini və maddi resursları minimuma endirə biləcəklər. Layihə həmçinin kənd təsərrüfatı sahələrini kamera nəzarəti altında saxlamaq, səmərəliliyi və davamlılığı artırmaq, ətraf mühitin təsirlərindən qorumaq, pul və vaxta qənaət etmək, kənd təsərrüfatında insan əməyini azaltmaq məqsədlərini daşıyan multidissiplinar bir məhsul kimi təqdim edilib. Bununla zərərvericiləri əkin sahəsindən uzaqlaşdırmaq üçün xüsusi səs sistemi də yaradılıb”.

Daha sonra xəbərdə, “layihə sintezlənmiş Super Absorbent Polimer (SAP) hidrogellərlə parklar və magistral yol kənarındakı yaşıllıq ərazilərdə suvarma sisteminə ehtiyac olmadan torpağın nəmliyini tənzimləyə bilən bir sistemin inkişafını da nəzərdə tutur. “TEKNOFEST-2024”ün finalına yüksələn ikinci BDU komandası “ESST-6” isə “E-tarım sulama” layihəsi ilə təmsil olunur. Layihə kiçik maliyyəli və yüksək keyfiyyətli ağıllı suvarma texnologiyasının yaradılmasına yönəlib. Bu sistem bitkilərə yalnız ehtiyac duyduqları qədər su verərək su israfını minimuma endirir və su istifadəsini daha səmərəli idarə edir. Layihənin əsas məqsədi suvarma proseslərini daha effektiv və sürətl, kənd təsərrüfatı sahəsində çalışanları daha yüksək məhsuldarlıqla təmin etməkdir” deyə bildirilir.

Qeyd edək ki, sentyabrın 8-dək davam edəcək “TEKNOFEST-Akdeniz 2024”ün finalında 1 min 270 komanda, 6 min 514 finalçı yarışır. Ümumilikdə yarışmada 774 min 296 komanda və 1 milyon 569 min 944 nəfər iştirak edib.

Mission News Theme by Compete Themes.