BAYRAQDAR MEDİA – Sentyabrın 2-də Türkiyə Cümhurbaşqanı Recep Tayyip Erdoğan Azərbaycan Prezidenti İlham Əliyevə zəng edib.
Xəbəri Azərbaycan Prezidentinin mətbuat xidməti yayıb.
Bildirilir ki, R.T.Erdoğan Azərbaycanda keçirilən parlament seçkilərində Yeni Azərbaycan Partiyasının inamlı qələbəsi münasibətilə dövlət başçısına təbriklərini çatdırıb.
Qeyd edilir ki, Türkiyə Cümhurbaşqanı bu seçkilərin Azərbaycanın suverenliyinin tam bərpa edilməsindən sonra ölkənin bütün ərazisində keçirilən ilk parlament seçkiləri olmasının önəmini qeyd edib. R.T.Erdoğan seçkilərin azad, sərbəst, demokratik şəraitdə keçdiyini və Azərbaycan xalqının iradəsini əks etdirdiyini vurğulayıb.
İlham Əliyev də öz növbəsində təbrikə görə təşəkkürünü bildirib.
“Telefon danışığı zamanı Azərbaycanla Türkiyə arasında parlamentlərarası əlaqələrin əhəmiyyəti və parlament nümayəndə heyətlərinin mütəmadi qarşılıqlı səfərləri qeyd olunub. Eyni zamanda, ölkəmizdə keçirilən bu seçkilərdə Türkiyə Böyük Millət Məclisinin parlamentlərarası dostluq qrupunun müşahidəçi qismində geniş tərkibdə iştirak etdiyi bildirilib”, – deyə xəbərdə bildirilir.
O da bildirilir ki, “söhbət zamanı Azərbaycan ilə Türkiyə arasında qardaşlıq və strateji müttəfiqlik münasibətlərinin perspektivlərinə dair fikir mübadiləsi aparılıb”.
