BAYRAQDAR MEDİA – Bakı Dövlət Universitetinin (BDU) daha 13 məzunu “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-cı illər üçün Dövlət Proqramı”nın iştirakçısı adını qazanıb və məşhur universitetlərdə magistratura təhsili alacaq.
Bu haqda xəbər BAYRAQDAR MEDİA-ya BDU-nun mətbuat xidmətindən daxil olub.
Xəbərdə qeyd olunur ki, “2024-2025-ci tədris ili üçün həyata keçirilən sənəd qəbulunun növbəti siyahısına əsasən, proqramın iştirakçısı adını qazanan 205 nəfərdən 13-ü BDU-nun məzunudur. Onlardan 8-i Böyük Britaniya və Şimali İrlandiya Birləşmiş Krallığı, 4-ü Amerika Birləşmiş Ştatları, 1-i İsveç Krallığının məşhur universitetlərində təhsil alacaq. BDU məzunları tərəfindən üstünlük verilən əsas ixtisas istiqamətləri dövlət idarəetməsi, ictimai siyasət, maliyyə, biotexnologiya, fizika, data elmi və maşın öyrənməsidir”.
Qeyd edək ki, bundan əvvəl BDU-nun 30 məzunu 2024-2025-ci tədris ili üçün Dövlət Proqramının iştirakçısı adını qazanıb.
Prezident İlham Əliyevin Sərəncamı ilə təsdiq olunan Dövlət Proqramının əsas məqsədi gənclərə xarici ölkələrin nüfuzlu ali təhsil müəssisələrində təhsilalma imkanları yaratmaqla, Azərbaycanın dayanıqlı inkişafını təmin edəcək və qlobal çağırışlara cavab verəcək yeni texnologiyaları çevik mənimsəyən, praktiki bilik və bacarıqlara yiyələnən, müasir və gələcək əmək bazarının tələblərinə cavab verən rəqabətqabiliyyətli və yüksəkixtisaslı peşəkar kadrların hazırlanmasını təmin etməkdir.
