Son yeniləmə: 9 İyul 2024 09:33
Türkiye Cumhuriyeti Cumhurbaşqanlığı İletişim Başqanlığının qardaşlıq töhfəsi
BAYRAQDAR MEDİA – Türkiye Cumhuriyeti Cumhurbaşqanlığı İletişim Başqanlığı tərəfindən “Bir millət, iki dövlət” şüarı ilə hazırlanan “Azərbaycanın sirləri” kitabı işıq üzü görüb.
Bu barədə İletişim Basşqanlığının məlumatında qeyd edilib.
Məlumata görə, nəşrdə Türkiyə-Azərbaycan qardaşlığı, Qarabağ Zəfəri, Azərbaycanın dərin tarixə malik mədəniyyəti əks olunub.
Bildirilib ki, kitabın “Ön söz” müəllifi Türkiyə Cümhurbaşqanı Recep Tayyip Erdoğandır. Türkiyə Cümhurbaşqanı nəşrdə Azərbaycanla bağlı fikirlərini belə ifadə edib: “Ana yurdu Ergenekonda dəmir dağını əridən türkün əzmi Azərbaycanda 44 günlük Qarabağ Zəfəri ilə yenidən ortaya çıxaraq bəxtini bir daha dəyişdi. Öz vətən torpaqlarında antiterror əməliyyatı həyata keçirərək 2023-cü ilin sentyabrında ərazi bütövlüyünü uğurla bərqərar edən Azərbaycanın yaşadığı haqlı qürur və sevinci bütün türk xalqları paylaşır. Bu Qələbə Zəngəzur dəhlizi vasitəsilə türk dövlətlərinin coğrafi bütövlüyü və qardaşlığını daha da gücləndirmək imkanı, regionda və bütün dünyada sülhün təminatı olmaq fürsətini yaradıb”. R.T.Erdoğan vurğulayıb ki, türk birliyi içərisində öz maddi dəyərlərinə hər zamankından çox sahib çıxaraq mədəni gücü hakim etmək üçün könül körpülərini daha da gücləndirmək türk milləti və dövlətlərinin ən mühüm məqsədi olmalıdır. “Azərbaycanın sirləri” kitabı bu hədəfə çatmaq yolunda gözəl bir addımdır.
Qeyd edək ki, “Türkiyə-Azərbaycan qardaşlığı”, “Bəşəriyyətin Qeyri-Maddi Mədəni İrs Reprezentativ Siyahısında ümumi mədəni miraslarımız”, “UNESCO-nun Qeyri-Maddi Mədəni İrs Siyahısında Azərbaycan”, “UNESCO Dünya Mirası Siyahısında Azərbaycan”, “Azərbaycanın turizm məkanları” və “Şuşa” mövzularında altı fəsildən ibarət kitabda iki ölkə arasındakı qardaşlıq bağlarının tarixi kökləri, “Bir millət, iki dövlət” şüarı, ölkələrimizin ortaq baxışı, fəaliyyəti və müqavilələri, Qarabağ Zəfəri, Şuşa Bəyannaməsi, Ortaq Media Platformasının yaradılması və s. kimi müxtəlif məqalələr yer alıb. Nəşrdə Azərbaycanın şanlı Zəfəri ilə nəticələnən İkinci Qarabağ müharibəsi xüsusi hazırlanmış infoqrafiklə təqdim edilib.
Azərbaycan, türk və ingilis dillərində nəşr edilən kitabda hər mövzuya dair xüsusi fotoşəkillər yerləşdirilib.
