BAYRAQDAR MEDİA – Ümumrespublika təmizlik aksiyaları çərçivəsində 29 iyun tarixində Pirallahı rayonunun Dübəndi qəsəbəsi və Lənkəran şəhərinin Xəzər dənizi sahillərində, Kür çayının Şirvan şəhərindən, Bərgüşad çayının Qubadlı şəhərindən, Yuxarı Qarabağ kanalının Beyləqan rayonu ərazisindən keçən hissələrində, Xaçmaz rayonunun Xudat, Göygöl rayonunun Hacıkənd, Oğuz rayonunun Oğuz meşəbəyliklərində, Qəbələ və Kürdəmir rayonlarının ərazisində iməciliklər keçirilib.
Bu haqda Ekologiya və Təbii Sərvətlər Nazirliyinin (ETSN) yaydığı xəbərdə qeyd olunur.
Xəbərdə deyilir ki, “ETSN, yerli icra hakimiyyəti orqanlarının, bələdiyyələrin, yerli kommunal müəssisə kombinatlarının nümayəndələrinin, sakinlərin və könüllülərin iştirakı ilə keçirilən iməciliklər zamanı 3.5 tondan artıq tullantı yığılaraq ərazilərdən daşınıb”.
Təmizlik aksiyalarının keçirilməsində məqsəd hər kəsi istirahət edərkən tullantıları ətrafa atmamağa, təmizliyə riayət etməyə təşviq etmək, ictimaiyyətin diqqətini bu sahəyə çəkməklə ətraf mühitin qorunmasına nail olmaqdır.
İlk şərhi yaza bilərsiniz