Son yeniləmə: 30 İyun 2024 22:06
BAYRAQDAR MEDİA – İyunun 28-də Azərbaycan Dövlət Mədəniyyət və İncəsənət Universiteti (ADMİU) nəzdində fəaliyyət göstərən Humanitar Kollecdə “Məzun Günü” keçirilib.
Bu haqda xəbər BAYRAQDAR MEDİA-ya sözügedən Kollecin mətbuat xidmətindən daxil olub.
Xəbərdə deyilir ki, “tədbirdə Kollec rəhbərliyi, professor-müəllim heyəti, qonaqlar və cari ilin məzunları iştirak ediblər. “Məzun Günü” Dövlət Himninin sədaları ilə açıq elan olunub. Daha sonra Azərbaycanın ərazi bütövlüyü və müstəqilliyi uğrundan canından keçən Vətən müharibəsi şəhidlərinin xatirəsi anılıb. Kollecin direktoru, musiqişünas Nərmin Qaralova bu əlamətdar gün münasibəti ilə məzunları təbrik edərək xoş arzularını bildirib. Humanitar Kollecin Azərbaycan üçün savadlı mütəxəssislər yetişdirdiyini qeyd edən direktor kollecin fəaliyyəti, uğurları, təhsil sistemi haqqında məlumat verib. N.Qaralova Azərbaycanda elm və təhsilin inkişafına göstərilən dövlət qayğısından danışaraq qeyd edib ki, bu gün məzunlar Azərbaycan incəsənətinin inkişafına töhfələr verirlər”.
Daha sonra xəbərdə bildirilir ki, “məzunları təbrik edən musiqişünas alim, sənətşünaslıq elmləri doktoru, ADMİU-nun rektoru, Prof. Ceyran Mahmudova onlara gələcək həyatında uğurlar arzulayıb. Diqqətə çatdırıb ki, son illərdə gənclər siyasətinə xüsusi diqqət yetirilir. Rektor bildirib ki, gənclik daim axtarışda olan, yeniliyi sevən, ideyalarla zəngin bir aparıcı qüvvədir. C.Mahmudova əlavə edib ki, bu qüvvəni yalnız yüksək elm və təhsillə, qabiliyyət və bacarıqla reallaşdırmaq mümkündür”.
“Məzun Günü”ndə tanınmış incəsənət xadimləri, məşhur simalar – Emil Bədəlov, İlkin Dövlətov, Yaqut Xəlilzadə, Yaşar Yusub və başqaları öz ifaları ilə məzunları təbrik ediblər. Kollecin tələbələri də sənətçilərlə eyni səhnəni bölüşüblər. Onların ifasında nəğməli səhnəciklər təqdim olunub. Tədbirin aparıcısı Toğrul Artın çıxışı və DJ Hamo ZeRin səsləndirdiyi rəngarəng musiqi “Məzun Günü”nü daha da əyləncəli edib.
Qeyd edək ki, bu tədris ilində ADMİU nəzdində Humanitar Kollecin 400-dən çox tələbəsi məzun olub.
