BAYRAQDAR MEDİA – Azərbaycan Milli Elmlər Akademiyası (AMEA) Mərkəzi Elmi Kitabxanasının (MEK) rəhbərliyi ilə qardaş Özbəkistanın Ürgənc Dövlət Universitetinin nümayəndə heyəti arasında hibrid formada görüş keçirilib.
Bu haqda xəbər BAYRAQDAR MEDİA-ya MEK-dən daxil olub.
Xəbərdə qeyd olunur ki, “MEK-in direktoru texnika elmləri üzrə fəlsəfə doktoru, Dos. Hüseyn Hüseynov öncə Ürgənc Dövlət Universitetinin (ÜDU) kitabxana direktoru Həsən Siddikov və Daşkənd Tibb Akademiyasının Ürgənc filialının dosenti Dilşad Qurbanovu kitabxanada qəbul edib, qurumun fəaliyyəti və beynəlxalq əlaqələri haqqında ümumi məlumat verib, onları kitabxana ilə yaxından tanış edib. Qonaqlar Diplomatik fondda müxtəlif ölkələrin, o cümlədən Özbəkistanın diplomatik nümayəndəliyi tərəfindən MEK-ə hədiyyə edilən kitablardan ibarət guşələrə baxıblar. ÜDU-nun rəhbər heyəti isə görüşə onlayn qatılıb. MEK-in direktoru iki qardaş ölkənin elmi kitabxanaları və qurumları arasındakı mədəni əlaqələrdən danışıb, zəngin fondların inkişafı üçün MEK-in imkanlarını vurğulayıb”.
Daha sonra xəbərdə deyilir ki, “sözügedən Universitetin prorektoru Dilşad İbadullayeviç təmsil etdiyi universitet haqqında məlumat verib. Bildirib ki, ÜDU təhsil və elm sahəsində xarici ali təhsil müəssisələri ilə əməkdaşlıq coğrafiyasını genişləndirmək məqsədi ilə dünyanın 30-dan artıq ölkəsinin 80-dən çox nüfuzlu ali təhsil müəssisəsi ilə müqavilələr imzalayıb və əməkdaşlıq edir. Prorektor onların sırasında AMEA-nın nəzdindəki MEK-in xüsusi yeri olacağından əminliyini ifadə edib. Qonaqlar H.Hüseynovu cari ilin sentyabr ayında ÜDU-nun kitabxanasının yeni binasının açılışına dəvət ediblər”.
Xəbərdə, həmçinin “MEK-in Elektron xidmətlər və informasiya resursları üzrə direktor müavini Oruc Quliyev, Kitabxana işləri üzrə direktor müavini Şəhla Tahirqızı, elmi katib Şəbnəm Rüstəmova da yaranacaq əməkdaşlığın vacibliyini vurğulayaraq ÜDU-nun fondunun zənginləşdirilməsində 100 yaşını qeyd edəcək MEK-in yaxından köməklik göstərəcəyini qeyd ediblər. Eləcə də diqqətə çatdırılıb ki, kitabxanada özbək dilində çoxsaylı ədəbiyyat qorunur ki, bu da Azərbaycan və özbək xalqlarının ortaq tarixi kökləri ilə birlikdə, həm də poeziya ənənələrinin, milli-mənəvi dünyasının da nə qədər yaxın və doğma olmasının mühüm göstəricilərindən biridir” deyə bildirilir.
