Son yeniləmə: 14 İyun 2024 14:21
Dos. Dr. Soner Sağlam: Ümid edirik ki, türk dünyası ədəbiyyatının müxtəlif simaları üçün belə xüsusi buraxılışlar hazırlanacaqdır
BAYRAQDAR MEDİA – 2024-cü il türk dünyası ədəbiyyatının dahi şəxsiyyətlərindən olan Mahtumkulu Firakinin (1724-1807) anadan olmasının 300 illiyi kimi qeyd edilir.
Türk dünyasının əksər ölkələrində, xüsusən də Türkmənistanda Mahtumkulu ilə bağlı tədbirlər keçirilir. Bu çərçivədə Türkiyədə Folklor Akademiyası dərgisi çərçivəsində “Doğumunun 300. Yılında Mahtumkulu Firaki ve Türkmen Edebiyatı Özel Sayısı” nəşr olunub. Xüsusi buraxılışa redaktorluğu Türkiyədə Mahtumkulu Firaki və Türkmən ədəbiyyatı ilə bağlı çoxlu araşdırmaları olan Pamukkale Universitetinin müəllimi Dos. Dr. Soner Sağlam və Türkmənistan Elmlər Akademiyası Mahtumkulu Dil, Ədəbiyyat və Əlyazmalar İnstitutunun direktoru Dr. Bunu Davud Orazsahedov edib.
Bu barədə BAYRAQDAR MEDİA-ya özəl olaraq Dos. Dr. Soner Sağlam məlumat verib.
Bildirilib ki, “xüsusi buraxılışda Azərbaycan, Türkmənistan, Qazaxıstan və Türkiyədən ümumilikdə altı məqalə yer alıb. Ümumiyyətlə Türkiyədə Mahtumkulu ilə bağlı bir çox mühüm araşdırmalar aparılıb və hələ də aparılmaqdadır. Lakin Mahtumqulu haqqında məqalələr ilk dəfə Referees and International Indexes tərəfindən indeksləşdirilən akademik jurnalda dərc olunub. Bu xüsusi buraxılışda əməyi keçən hər kəsi təbrik edir və ümid edirik ki, türk dünyası ədəbiyyatının müxtəlif simaları üçün belə xüsusi buraxılışlar hazırlanacaqdır”.
