BAYRAQDAR MEDİA – İyunun 12-də Aşqabad şəhərində Türkmənistan Xarici İşlər Nazirliyinin, BMT-nin Türkmənistandakı Rezident Əlaqələndiricisinin Ofisi, Azərbaycanın və Birləşmiş Ərəb Əmirliklərinin Türkmənistandakı səfirliklərinin təşkilatçılığı ilə “Dubaydan Bakıya yol – COP29 öncəsi” adlı tədbir keçirilib.
Bu barədə xəbəri Azərbaycanın Türkmənistandakı səfirliyi yayıb.
Xəbərdə deyilir ki, “tədbirdə məruzəçilər çıxış edərək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 28-ci sessiyasının (COP28) sonrakı fəaliyyətlərə dair yeniliklərin təqdim edilməsi və 2024-cü ilin noyabr ayında Azərbaycanda keçiriləcək COP29 sammitinə hazırlıqların müzakirəsi, eləcə də yaşıl enerji, alternativ enerjiyə keçid və metan emissiyalarının azaldılması istiqamətində fikir mübadiləsi aparılıb”.
Bildirilib ki, ““Our land. Our future. We are #GenerationRestoration.” devizi altında keçirilən tədbirdə Davamlı İnkişaf Məqsədləri (SDG) səfirlərinin, tələbələrin, könüllülərin və eko-fəalların iqlim dəyişikliyi ilə bağlı keçirilən konfranslarda xüsusi töhfələri vurğulanaraq onların 2023-cü ildə Dubayda keçirilən COP28 çərçivəsində Qlobal Gənclik İqlim Konfransında (LCOY23) yaxından iştirak etdiyi qeyd olunub”.
Azərbaycanın Türkmənistandakı səfiri Qismət Gözəlov çıxış edərək, 2024-cü ilin Azərbaycanda “Yaşıl dünya naminə həmrəylik ili” elan edildiyini bildirib, həmçinin Azərbaycanın iqlim dəyişikliyi ilə bağlı həyata keçirdiyi layihələr, Azərbaycanda yaşıl enerji istiqamətində görülən işlərə diqqət çəkib. Səfir Azərbaycanda keçiriləcək qlobal əhəmiyyətli COP29 ilə bağlı iştirakçıları məlumatlandırıb, həmçinin könüllülərin COP29-un təşkilində də mühüm rol oynayacağını bildirib. Bu xüsusda COP29-da könüllülərin iştirakını təşkil etmək üçün volunteers.cop29.az portalının istifadəyə verildiyini və portalda 16 minə yaxın olan namizədin qeydiyyatdan keçdiyini, təxminən 3 min yerli və beynəlxalq könüllünün prosesə cəlb olunmasının gözlənildiyini qeyd edib. Səfir Azərbaycan, BƏƏ və Braziliyanın həmsədrliyi ilə COP sədrləri üçlüyünə diqqət çəkərək iqlimlə bağlı fəaliyyətin gücləndirilməsinə təkan verən cari və gələcək COP sessiyalarına sədr ölkələr arasında əməkdaşlığın, eləcə də davamlılığı daha da yüksəltmək üçün COP sədrlikləri üçlüyünün əhəmiyyətinə toxunub.
Səfir bildirib ki, “Azərbaycan və Türkmənistan alternativ enerji və iqlim dəyişikliyi ilə bağlı həyati məsələlərin həllində inamla irəliləyir. Sevindirici haldır ki, hər iki ölkə neft və təbii qazla zəngin olsa da ölkələrimiz metan emissiyası öhdəliklərinə sadiq qalaraq iqlim dəyişikliyi layihələrinə töhfə verir. Biz əminik ki, qardaş Türkmənistan da 2024-cü ilin noyabr ayında Azərbaycanda keçiriləcək COP29 sammitinə öz töhfəsini verəcəkdir”.
Məlumata görə, səfir tədbirdə minaların dağıdıcı təsirinə diqqət çəkərək Azərbaycan ərazilərində mövcud mina təhlükəsi, habelə onun yaratdığı ciddi ekoloji və humanitar fəsadlardan danışıb, minaların və partlamamış sursatların ətraf mühitə təsiri, mülki əhali və mədəni irsə zərər vurmaqla yanaşı son nəticədə dayanıqlı inkişafa (SDG) maneçilik törədən kəskin problem olduğunu vurğulayıb.
